Po wólbach w Sakskej: CDU dale najsylniša strona, AfD z najwjetšim přirostom, Lěwica přěhrała
Budyšin (SN/at). Nowemu sakskemu parlamentej přisłušataj dwaj Serbaj. Alojs Mikławšk a Marko Šiman (wobaj CDU) staj swój mandat we wólbnymaj wokrjesomaj při wčerawšich wólbach Sakskeho krajneho sejma zakitowałoj. Najsylniša politiska móc w swobodnym staće je dale CDU, kotraž docpě 32,1 procent (-7,3) płaćiwych hłosow. Tak su sej křesćanscy demokraća po wólbach zwjazkoweho sejma 2017 a lětušich europskich wólbach atribut „najsylniša politiska móc“ wróćo zdobyli. To ma so strona w prěnim rjedźe načolnemu kandidatej, ministerskemu prezidentej Michaelej Kretschmerej dźakować. Wolerjo zamóchu cyłosakskemu wuspěchej AfD zadźěwać.
AfD ma ze 27,5 procentami (+17,7) najwjetši přirost hłosow. Wona ma so za „woprawdźitu wólbnu dobyćerku“. W brunicowych, namjeznych a zestarjenych kónčinach je wona wosebje wjele wuspěcha žnjała. To zwuraznja so tež we Wulkej Dubrawje (45,7%) a Njeswačidle (44,6%). Wonej stej mjenowanej mjez dźesać gmejnami z najsylnišimi lisćinowymi wuslědkami AfD w Sakskej.