Choćebuz/Janšojce (dpa/SN). W Janšojskej brunicowej jamje njesmědźa wot wčerawšeho najprjedy raz žane wuhlo wjace wudobywać. Choćebuske wyše zarjadniske sudnistwo je minjeny pjatk wukazało dźěła w jamje přetorhnyć, dokelž njeběchu energijowemu zastaraćelej LEAG jako mějićelej jamy přizwolili dobu za zdźěłanje pruwowanja wobswětoweje znjesliwosće podlěšić. LEAG bě wo to prosyła, pruwowanski čas hač do nowembra podlěšić. Zarjadniske sudnistwo wopodstatni swój rozsud z tym, zo njeje koncern LEAG žane přičiny mjenować móhł, kotrež bychu změnu dotalneho wusuda woprawnili. LEAG měješe hač do kónca awgusta chwile, pruwowanje wobswětoweje znjesliwosće předpołožić.

Wuchadźišćo rozsuda bě skóržba Němskeje wobswětoweje pomocy zhromadnje ze Zelenej ligu přećiwo hłownemu zawodnemu planej brunicoweje jamy za lěto 2019. Wobswětoškitarjo so boja, zo móhli klumpy dnowneje wody wokoło jamy wosebje škitane kónčiny kaž bahna wohrozyć. Ze skóržbu chcedźa tomu zadźěwać, zo LEAG jamu na sewjer rozšěri, a chcedźa krajinu we wokolinje před wusušenjom škitać.