Połojca nominowanych idejow Sakskeho fondsa „Čiń sobu!“ je serbska

Wojerecy (SN/at). We wubědźowanju Sakskeho fondsa „Čiń sobu!“ 2019 je so dźensa poslednja etapa zahajiła. Nětko su wobydlerjo namołwjeni, we wobłuku online-wothłosowanja hač do 6. oktobra swoju faworizowanu projektowu ideju za myto publikuma wuzwolić.

Dźesać idejow je w interneće pod https://www.mitmachfonds-sachsen.de/ publikumspreis/lausitz2019 podatych. Połojca z nich je serbska. Kak su so tam dóstali, rozłožuje Gabriela Hippe, regionalna managerka mjenowaneho fondsa za Łužiski hospodarski region: „Po směrnicach wubědźowanja je naš běrow we Wojerecach 20 projektowych idejow wuzwolił a je juroram předpołožił, kotřiž su hižo wo mytowanju w štyrjoch kategorijach rozsudźili. Woni su swojich dźesać faworitow mjenowali.“ Dźiwali su na to, zo wotpowěduje za ideju zapodaty financny ramik maksimalnej mytowanskej sumje 15 000 eurow.