Moskwa (dpa/SN). Ruska je měrliwym syriskim Kurdam zaručiła, zo smědźa w 30 kilometrow šěrokim wěstotnym pasmje na sewjeru kraja podłu mjezy k Turkowskej wostać. Njeje trjeba, zo dyrbja měrliwi wobydlerjo swoje bydlenja wopušćić. To je ruski zakitowanski minister Sergej Šojgu po informacijach nowinarjow we wčerawšej widejowej konferency ze syriskimi demokratiskimi mocami (SDF) rjekł, kotrež kurdisku milicu YPG dominuja. Garant za wěstotu su ruska wojerska policija a syriscy pomjezni wojacy, praji Šojgu w rozmołwje z komanderom SDF Maslumom Abdijom.
Sergej Šojgu zdobom připowědźi, zo chcyli ruscy wojacy swoje patrulje rozšěrić a ličbu syriskich jednotkow na syrisko-turkowskej mjezy powjetšić. General Maslum dźakowaše so po informacijach medijow Ruskej a jeje prezidentej Wladimirej Putinej za garantiju wěstoty kurdiskeho ludu a za kročele, kotrež su přiměr w potrjechenej kónčinje zmóžnili. Komander w tym zwisku wobkrući, zo „su Rusojo a Syričenjo mjeztym zepěranišća wobsadźili. Podpěrujemy jich po swojich móžnosćach.“