Albansku přesćahnyć!

Montag, 18. November 2019
Artikel bewerten
(0 Stimmen)
Prawdźepodobnje je so nětko samo hač do zwjazkoweho knježerstwa dopowědało, zo je Němska na polu mobilneho telefonowanja wuwićowy kraj. „Běłe blaki“ předewšěm we wjesnych kónčinach tomu polěkuja, zo zaběra najmócniši industrijny kraj Europy zastaranje z mobilnej telefoniskej syću nastupajo městno za Albanskej a Libanonom. Nětko pak budźe wšitko lěpje. Knježerstwo je wobzamknyło, tysacy nowy sćežorow po cyłym kraju nastajeć a fatalnu situaciju skónčnje přewinyć. Prašam so, čehodla su w Berlinje tak dołho trjebali mizeru spóznać. Kóždy dowolnik, kiž z južnoeuropskich krajow domoj přijědźe, zahoriće rozprawja, kak wulkotnje su tam z mobilnej syću zastarani. Haj, trjebaš jeno přez mjezu do Čěskeje jěć, zo by to samsne spóznał. Ale nětko so w Berlinje gratu přimaja. To směmy wćipni być. Namjetuju hesło: „Doprědka do noweho digitalneho časa! Přesćehńmy Albansku!“ Marko Wjenka

Veröffentlicht in Politika
Bitte anmelden, um einen Kommentar zu posten

Anzeige