Dźěło z młodźinu jedne z ćežišćow było

Čorny Chołmc (SN/JaW). Połoženje serbskeho ludu, dźěło z młodźinu a strukturna změna běchu ćežišća zetkanja poradźowaceho wuběrka za prašenja serbskeho luda Zwjazkoweho ministerstwa za nutřkowne naležnosće zawčerawšim w Čornym Chołmcu. Nawjedował bě je społnomócnjeny zwjazkoweho knježerstwa za prašenja wusydlencow a narodne mjeńšiny prof. dr. Bernd Fabritius.

Nimo zastupnikow Domowiny – předsydy třěšneho zwjazka Dawida Statnika a městopředsydow Marka Hančika a Wylema Janhoefera – wobdźělištaj so tež direktor Załožby za serbski lud Jan Budar a předsydka załožboweje rady Susann Šenkec. Zwjeselena wupraji so Šenkec wo tym, zo staj wobaj społnomócnjenaj za strukturnu změnu we Łužicy, dr. Ste­phan Rohde za Saksku a dr. Klaus Freytag za Braniborsku, přišłoj. Dale wobdźěleni běchu zapósłancy Zwjazkoweho sejma Torsten Herbst (FDP), Stephan Kühn (Zwjazk 90/Zeleni) a Karsten Hilse (AfD).