Dobroćiwe mjezwočo prěnjeho ministerskeho prezidenta lěta 1990 wutworjeneho kraja Braniborskeje, kotrež wuhladamy na mjeztym historiskim foće załoženskeho akta Załožby za serbski lud 19. oktobra 1991 na skutkowanišću Handrija Zejlerja před wołtarjom Łazowskeje cyr­kwje, wostanje Serbam w pomjatku. Po ćežkej chorosći je Manfred Stolpe 83lětny w nocy na 29. december 2019 zemrěł.

16. meje 1936 w Stettinje rodźeny ma trajne zasłužby jako posrědkowar. Za čas NDR bě studowany jurist wot lěta 1982 hač do towaršnostneho přewróta konsistorialny prezident wuchodneho regiona Ewangelskeje cyrkwje Berlin-Braniborska a zdobom městopředsyda Zwjazka ewangelskich cyrkwjow w NDR. Zastojnstwow dla měješe tež kontakty z ministerstwom za statnu bjezstrašnosć NDR. Tohodla Stolpemu jako ministerskemu prezidentej přeco zaso wumjetowachu, zo je za stasi dźěłał. Zwjazkowe wustawowe sudnistwo pak lěta 2005 sudźeše, zo njebě wón „inoficialny sobudźěłaćer“ (IM) NDRskeje tajneje słužby.