Coronawirus „najwjetše wužadanje po Druhej swětowej wójnje“

Berlin (dpa/SN). Hladajo na strašnu epidemiju coronawirusa dla zwjazkowe knježerstwo wobydlerjow namołwja, so dotal njesłyšanym wobmjezowanjam wšědneho žiwjenja kłonić. „Dodźeržće předpisy“, podšmórny zwjazkowa kanclerka Angela Merkel (CDU) wčera wječor w telewizijnej narěči. Socialne kontakty měli so na minimum redukować, zo njeby so wirus tak spěšnje rozšěrjał a strowotniski system přežadany był. Při tym je disciplina trěbna.

Kriza ma mjeztym historiske dimensije, rjekny Angela Merkel. „Po zjednoćenju Němskeje, ně, po Druhej swětowej wójnje njeje naš kraj wjace tajke wužadanje dožiwił, kotrež žada sej naše zhromadne, solidariske jednanje.“ Přidatne, hišće razniše naprawy, kaž powšitkowny zakaz dom wopušćić, kanclerka njepřipowědźi. Knježerstwo spochi pruwuje, štož móhło zaso korigować, „ale tež to, štož je snano hišće trěbne“.