Widejowa konferenca prezidija CDU – Wöller protestow dla znjeměrnjeny
Berlin/Drježdźany (dpa/SN). Hladajo na přiběrace demonstracije přećiwo wobmjezowanjam koronakrizy dla zwjazkowa kanclerka Angela Merkel (CDU) namołwja, kedźbliwje z pandemiju wobchadźeć. Jej su rozprawjeli, zo bě minjeny kónc tydźenja tójšto ludźi bjez škita za hubu a nós nakupować było, rjekny Merkel po informacijach powěsćernje dpa na wčerawšej widejowej konferency prezidija CDU. Zdźěla su so ludźo z tym samo hišće hordźili. „Přiwšěm přeco hišće płaći, zo měł kóždy płaćiwe rjadowanja dodźeržeć.“
Angela Merkel na to pokaza, zo budźe hakle za dwaj abo tři tydźenje widźomne, kak so minjeny tydźeń wobzamknjene wolóženja koronanaprawow na ličbu infekcijow wuskutkuja. Nimo toho wona připowědźi, zo chcyła jutře w zwjazkowym sejmje při woprašowanju knježerstwa znowa rozłožić, z kotrymi ličbami zwjazkowe knježerstwo wuwiće pandemije posudźuje a zastopnjuje. Kanclerce a zwjazkowemu knježerstwu běchu naposledk wumjetowali, zo z rozdźělnymi měritkami ludźi zamyla.