Brunica najpozdźišo wot lěta 2038 hižo wudobywana njebudźe

Berlin/Budyšin (SN/BŠe). „Bóh tón knjez je stworił Łužicu, a čert je zarył brunicu“, rěka štučka w „dalewjedźenju“ spěwa „Wo ničo so jara njestaram“. Starali pak su so dźensa zapósłancy Němskeho zwjazkoweho sejma wo to, zo ma wuhlo w zemi wostać, a rozsudźichu wot lěta 2038 „čertowsku“ brunicu hižo njewu­dobywać, kotraž dźě stawizny Łužicy hižo­ lětdźesatki dołho postaja. Rozsud je w zmysle Serbow historiski. Wšako z dźensa wobzamknjenym zakonjom jasne­, zo njebudu nimo hižo wobzamknjenych žane dale sydlišća wotbagro­wane. Cyłkownje 137 wsow serbskeho sydlenskeho ruma je so dotal brunicy dla zhubiło.