Wunošna struktura wjace njewobsteji, krajej po swójskim puću kročitej
Budyšin/Zhorjelc/Choćebuz (SN/at). Towaršnosć Łužiski hospodarski region (WRL) je po zaměrje załoženja rozpušćena. Budyski a Zhorjelski wokrjes ju kónc lěta wopušćitej (SN informowachu). Wutworjenje sakskeje krajneje wuwićoweje towaršnosće za strukturnu změnu SAS po kóncu wudobywanja brunicy, na čož přenjesechu w Podstupimje WRL samsny nadawk za Braniborsku, mjenuje Zhorjelski krajny rada Bernd Lange (CDU) „jeničku přičinu“ za wustup. Jeho Budyski kolega Michael Harig (CDU) rěči „wo bytostnej přičinje“. By-li Budyski wokrjes dotalnej towaršnosći dlěje přisłušał, „by jako towaršnik tež za mnohe projekty sobu zamołwity był, kotrež rjaduja angažementa Braniborčanow dla přez WRL“.