Wot 3. oktobra 1990 je Němska zjednoćeny kraj. Někotři Serbja su redakciji rozprawjeli, kak woni minjene 30 lět hódnoća.
Towarstwa wožiwili
Zjednoćenje Němskeje bě drje wuchadźišćo, wšelake serbske towarstwa wožiwić a załožić. To potrjechi tohorunja w nalěću 1991 nowozałoženu Maćicu Serbsku, kotrejež najwažniši zaměr hač do dźensnišeho je spěchować wědomostnu zaběru ze stawiznami a kulturu Serbow kaž tež wědu wo Serbach šěrić. Zwažu sej rjec, zo je Maćica wosebje w 1990tych lětach přez tójšto zarjadowanjow a publikacijow bytostnje přinošowała k wuswětlenju młódšich serbskich stawiznow.
dr. Anja Pohončowa
předsydka Maćicy Serbskeje
Towaršliwosć so pozhubiła
Wosobinsce dyrbju wuznać, zo so w demokratiskej Němskej derje čuju. Swobodu měnjenja, móžnosć samostatneho předewzaćelskeho skutkowanja a směć po wšěm swěće pućować, to sej přewšo wažu. Škoda, zo je so towaršliwosć z časa NDR w dalokej měrje zhubiła a indiwidualnosć přiběra. Bóh dał, zo so poradźi tendencam přiběraceho prawicarstwa w našej towaršnosći zadźěwać. Jan Nuk
