Krajny biskop Tobias Bilz rozmołwu z Domowinu připowědźił

Drježdźany/Hodźij (SN/at). Ewangelsko-lutherska krajna cyrkej Sakskeje je znapřećiwjenje Gerata Krawca z Hodźijskeje wosady přećiwo wutworjenju serbski sydlenskim rum přesahowaceho sotrowskeho cyrkwinskeho poměra w regionje mjez Budyšinom a Biskopicami wotpokazała. Wo tym informuje krajny cyrkwinski zarjad w nowinskej zdźělence. Geratej Krawcej, kiž bě w swójskim mjenje kaž tež w mjenje wosadnych Hodźijskeje Bjesady znapřećiwjenje zapodał, je krajny cyrkwinski zarjad rozsud w lisće z 23. februara zdźělił. Tón mjenuje muž Bjesady dźensa w rozmołwje z našim wječornikom „afront přećiwo serbskemu ludej“. Rozsud je padnył, prjedy hač měješe Krawc składnosć, swoju poziciju krajnemu biskopej Tobiasej Bilzej wujasnić. Rozmołwa bě za dźensa planowana.