Sakska Serbskemu forumej wědy při Lawskich hrjebjach přihłosowała
Drježdźany (SN/JaW). Sakska je njedźelu dalše konkretne projekty k zmištrowanju strukturneje změny we łužiskich brunicowych rewěrach schwaliła, mjez druhim tež planowany Serbski forum wědy při Lawskich hrjebjach w Budyšinje. Kaž ze Sakskeho ministerstwa za regionalne wuwiće rěka, je interministerielna dźěłowa skupina (IMAG) „ze zastupnikami wšitkich ministerstwow kónc tydźenja pod nawodom sakskeho statneho ministra za regionalne wuwiće Thomasa Schmidta dźewjeć projektow wuzwoliła“, tak rěčnik ministerstwa Frank Meyer. „Sym sej wěsty, zo budu runje tak kaž projekty wokrjesow a gmejnow tež předewzaća swobodneho stata sylnje k wuwiwanju struktury we łužiskim a srjedźoněmskim rewěrje přinošować“, wuzběhny minister Schmidt w njedźelnej zdźělence.