Zwjazkowy sejm „pandemiske połoženje narodneho rozměra“ podlěšił
Drježdźany (dpa/SN). W Sakskej płaći wot dźensnišeho nowe rjadowanje nastupajo škit před koronawirusom. Z nim chcedźa žiwjenje w koronapandemiji trochu wolóžić. Z nowym postajenjom, kotrež płaći hač do 22. septembra, njeje žadyn lockdown wjace móžny. Po wobzamknjenju krajneho knježerstwa chcedźa so jenož hišće na dwěmaj incidencomaj orientować: To płaći za dźesać abo 35 nowych infekcijow na 100 000 wobydlerjow w běhu tydźenja. Za to ma połoženje w chorownjach z pacientami, na koronu schorjenymi, přichodnje wjetšu rólu hrać. To je ministerka za strowotnistwo Petra Köpping (SPD) zdźěliła. Wotpowědnje ličbje pacientow budźe warnowanski schodźenk wukazany. We wjace wobłukach płaći potom zasada 3G: šćěpjeny, wustrowjeny abo testowany. Köpping zdźěli, zo chcedźa přichodnje wšitke wobchody a institucije wotewrěć a zarjadowanja njewotwisnje wot incidency zmóžnić. Dotal ma swobodny stat ze 14,7 po cyłej Němskej najsnadnišu incidencu natyknjenjow, Köpping rjekny. Tež połoženje w chorownjach njeje kritiske.
