Wólbny bój mjez CDU/CSU a SPD so dale přiwótřa
Berlin (dpa/SN). Tři tydźenje do wólbow zwjazkoweho sejma so rozestajenje mjez CDU/CSU a SPD, kotraž w aktualnych woprašowanjach nawjeduje, dale přiwótřa. Wodźacy politikarjo CDU a CSU sej wot SPD žadaja, so jasnje wot Lěwicy distancować. Kanclerski kandidat unije Armin Laschet (CDU) žada sej wot unije, „poslednju fazu wólbneho boja wužiwać a wojować. Mamy hišće wšitke šansy.“
Předsyda CSU Markus Söder rjekny nowinarjam kónc tydźenja hladajo na móžne koalicije, zo widźi jenož dwě móžnosći: pak jasny puć do směra na Lěwicu, pak amplowu koaliciju z FDP. Tola tež FDP njeby jako poměrnje mała strona zasadnemu lěwicarskemu wuwiću zadźěwać móhła. Kanclerskemu kandidatej SPD Olafej Scholzej Söder wumjetowaše, zo „nima jasne stejišćo k Lěwicy. Budźe wón ministra Lěwicy powołać, haj abo ně?“, so předsyda CSU praša.