Rom (SN/MG). Bamž Franciskus je ze swojim přihłosowanjom dokumentej „Fiducia suppicans“ – serbsce „prošaca dowěra“, puć k žohnowanju porow samsneho splaha pod wěstymi wuměnjenjemi rubał. W nim čitamy wo „móžnosći žohnowanja porow, kotrež su w iregularnych situacijach žiwi a kiž maja samsnosplažnych partnerow.“ Rozsud drje je dalokosahacy, ale Vatikan so dale spjećuje, homoseksualne poćahi z mandźelstwom na jednu runinu stajić. Tež cyrkwinske wěrowanja mjez mužom a mužom abo žonu a žonu dale móžne njejsu. Prašenje, hač měli so homoseksualne poćahi žohnować, je předmjet wulkich rozkorow w katolskej cyrkwi. Ale tež někotři biskopja, mjez nimi Drježdźansko-Mišnjanski Heinrich Timmerevers, rozsud dikasterija za prašenja wěry jara witaja. Na Instagramje da wón wozjewić: „Dźensa je swětowa cyrkej wažnu kročel šła. Zrozumju tutón dokument jako posylnjenje, dušepastyrstwo za queernych čłowjekow w zmysle bamža Franciskusa dale spěchować.“ Bamž bě so mjenujcy w zašłosći hižo wjacore razy pozitiwnje nastupajo připóznaće homoseksuality w cyrkwi wuprajił.