Serbska rada nochce sej wobmjezowanje sydlenskeho ruma lubić dać

Podstupim (SN/at). Braniborska Rada za naležnosće Serbow so z wusudomaj Choćebuskeho zarjadniskeho sudnistwa nastupajo přisłušnosć gmejnskich dźělow k zdźědźenemu serbskemu sydlenskemu rumej w padomaj gmejnow Kopańce (Neuhausen) a Dolina Nysy a Małkse (Neiße-Malxetal) njewotnamaka. Na njezjawnym widejowym posedźenju je rada wčera wobzamknyła, we woběmaj naležnosćomaj próstwu na Wyše zarjadniske sudnistwo Berlin-Braniborska zapodać, zo přizwoli rewiziju. Do toho su so gremij a hosćo wo pisomnje předležacymaj wusudomaj na skóržbje Kopańc a Doliny Nysy a Małkse wuměnili.