Dr. Cordula Ratajczakowa reaguje na přinošk „Su Serbja wopor kolonializma?“

Tež ja běch šokowana, jako čitach, zo sobudźěłaćerjej a sobudźěłaćerce Serbskeho instituta raznje prěja, zo su Serbja někajku formu kolonizacije dožiwili. Runja Timej Meškankej mam „wobraz měrliweje asimilacije do němcowstwa“, kotryž w interviewje 15. nowembra nastawa, za wopačny, za anachronistiske němske šerjenje z časow socializma a nacionalizma. Runja Grit Lemke widźu diskusiju wo „nutřkoněmskej kolonizaciji“ jako šansu – nic jenož, zo bychmy serbske stawizny, ale tež dźensniše serbskoněmske rěčne poměry lěpje rozumili a adekwatnje na nje reagowali. Zapřijeće „interna kolonizacija“ so hižo wot 1960tych lět we wědomostnym diskursu wužiwa. Koncept nutřkowneho kolonializma njestaja dóńt kolonizowanych indigenych ludow w Americe abo Africe z tym zapadnych ludźi na samsnu runinu, bazuje pak na podobnych principach: ludźi z namocu podrjadować, jim jich hłós a móžnosć samopostajenja wzać.