Powołanski puć je w Zgorzelecu rodźeneho Jędrzeja Solińskeho do Budyskeho Serbskeho muzeja wjedł

Dr. Jędrzej Soliński dźěła wot lěta 2022 w Budyskim Serbskim muzeju. Kónc lěta 2023 je městno jako kurator za wobłuk kulturne stawizny a literaturu a jako zastupowacy direktor muzeja nastupił. W interviewje z Milanom Pawlikom rozprawja 35lětny Polak mjez druhim nadrobnišo wo přičinach kaž tež připadach, kotrež su jeho do Łužicy dowjedli.

Hdy sće prěni raz wo Serbach słyšał? Kotry zwisk maće k Łužicy?

J. Soliński: Mam pochada dla regionalny zwisk k Hornjej Łužicy. Narodźił sym so w Zgorzelecu. Mój nan pochadźa z wjeski Trójcy w pólskej Łužicy, sydom kilometrow wot Zgorzeleca zdaleneje. Tam z mojej maćerju tehdy bydleše. Moja wowka a sotra nana tam dźensa hišće bydlitej. Wotrostł pak sym w Jelenjej ­Górje, dokal smy přećahnyli, jako běch něhdźe lěto stary. Wottam pochadźa moja mać. Wo Serbach jako narodnej mjeńšinje sym nadrobnišo w šulskim času na gymnaziju zhonił.

A po maturje sće studował?