Kak so po 12 lětach wuknjenja na dźěło do Alpow podach

Wot decembra 2024 do lětušeho apryla sym swoju domiznu Łužicu na běłe Alpy wuměniła – bjez toho zo bych wědźała, što na mnje čaka. Jako loni abituru złožich, rozsudźich so po 12 napinacych lětach wuknjenja za sezonowe dźěło w Alpach. Myslach sebi, tróšku dźěłać a připódla sněhakować je optimalny kompromis mjez dožiwjenjom a zasłužbu pjenjez. Zo na kóncu nimo dźěłanja hosći cyłeho swěta zeznach, njemóžach sej do toho wumolować. Tež, zo so rano do změny cyle samozrozumliwje na pistu podach, njemóžach sej spočatnje předstajić.

Tak podach so do hotela „Edelweiss“ w małej wjesce Zürs pola Arlberga. Dom połny tradicijow bě skerje butikowy hotel hač klasiska hěta w Alpach. ­Město ćěmneho drjewa wočakowachu mje tam ekstrawagantne barby, leopardowe mustry a přestrjency, wosebite swěcy a zmužite wuhotowanje rumnosćow. To njeje to, štož sej pod klasiskim alpskim hotelom předstaješ. Stare bě tu jenož twarjenje, koncept bě moderny, kreatiwny a połny překwapjenkow. Čim dlěje w hotelu přebywach, ćim bóle sym zmysł koncepta rozumiła.