Berlin (dpa/SN). Njeporadźenych wólbow sudnikow a dwělomneho rozsuda kanclera, zo Němska Israelej hižo wěste brónje njedodawa, dla je zwjazkowy kancler a šef CDU Friedrich Merz wčera wječor z najwušim nawodnistwom CDU w kanclerskim zarjedźe wuradźował. Po 100 dnjach w zastojnstwje rozmołwjachu so wo połoženju a zhromadnym dźěle w koaliciji z SPD kaž tež wo naledźe w ludnosći. Najprjedy bě nowina „Bild“ wo zetkanju rozprawjała. Na zetkanju w kanclerskim zarjedźe wobdźělichu so generalny sekretar CDU Carsten Linnemann kaž tež městopředsydaj strony, zwjazkowa kubłanska ministerka, Karin Prien kaž tež sakski ministerski prezident Michael Kretsch­mer, statna sekretarka za ratarstwo Silvia ­Breher a minister za strowotnistwo w Sewjernorynsko-Westfalskej Karl-Josef Laumann.