Awtonomny region so wšědnym nadpadam na křesćanow w Syriskej wobara

Hassakeh/Berlin (SN/mb). Porno nowemu islamistiskemu knjejstwu w Syriskej knježi w regionje sewjerneje a wuchodneje Syriskeje pluralita a diwersita. Tule postaja demokratisce legitimowane samozarjadnistwo. Swobodu su sej 2012 najprjedy předewšěm Kurdojo wuwojowali, ale na njej maja mjeztym jara wšelake skupiny ludnosće swój w „zrěčenju towaršnosće“ zaručeny podźěl. Oficielnje rěkaja kónčinam „awtonomna administracija sewjerneje a wuchodneje Syriskeje“, kurdisce „Rojava“ (zapad). Najebać to wójsko Turkowskeje, čłona NATO, tutón syriski region přećiwo prawu ludow spochi nadběhuje, dokelž so swobody Kurdow boja, kotrychž w Turkowskej politisce a kulturnje potłóčuja.