Zajimawe serbske aspekty woprašowanja „Łužiski monitor“ předstajili

Budyšin (SN/mb). „Jasnosć je wažniša hač harmonija“ rěka hesło dr. Jörga Heidiga. Zwjetša bywa wón w krajnej šuli za wohnjowu woboru w Narće. Wšako je specialita komunikaciskeho psychologi, zo pomha wosebje organizacijam, kiž 24 hodźin dźěłaja, potajkim wuchowanskej słužbje, policiji, hladarnjam atd. Wčera pak na žurli Serbskeho domu w Budyšinje referowaše: wo aktualnych serbskich aspektach Łužiskeho monitora, woprašowanja ludnosće regiona wuchodneje Sakskeje a južneje Braniborskeje, kotrež jeho firma „Prozesspsychologen“ hižo z 2020 kóžde lěto z partnerami přewjeduje. Partnerka je mjeztym tež Domowina. Jeje předsyda Dawid Statnik so wjeseleše nad wulkej rezonancu, kotruž je přeprošenje na prezentaciju dotal njewozjewjenych wuslědkow žnjało.