Spočatk septembra kónči so politiska karjera něhdyšeho wicekanclera

Berlin (dpa/SN). Něhdyši wicekancler a hospodarski minister Robert Habeck (Zeleni) wopušći zwjazkowy sejm. „Póndźelu sym prezidijej zwjazkoweho sejma zdźělił, zo swój mandat zwjazkoweho sejma 1. septembra wróću“, rjekny 55lětny nowinje taz. Prominentni politikarjo Zelenych jeho rozžohnowanje z politiku wobžaruja a jeho dźěło hódnoća. Habeck, kotryž bě kandidat na zastojnstwo kanclera w zašłych wólbach, zastupjerjow Unije wospjet raznje kritizowaše.

Rozsud, zo chce swój mandat spušćić, njebě za njeho „docyła lochki“. To rjekny Habeck we wideju, kotryž bě online wozjewił. Dołho bě wo tym rozmyslował. Wo swojich planach do přichoda rjekny wón taz: „Budu na wšelkich kubłanskich a slědźerskich zarjadnišćach we wukraju slědźić, wuwučować a wuknyć.“ Wón mjenowaše danski institut za mjezy­narodne slědźenja a uniwersitu Berkeley w Kaliforniskej. Jemu je wažne, zo „wotstawk k wuskemu korsetej Berlinskeje politiki dóstanje“.