Drježdźany (dpa/SN). Po słyšenju ekspertow nastupajo kubłanski čas w krajnym sejmje su reakcije wšelake. Debata wo tym, hač měli ludźo přidatne swobodne dny za dalekubłanja dóstawać, tuž dale traje. Frakcija CDU so dale zlutniwje wupraja. „Eksperća sej přezjedni njeběchu“, rjekny rěčnik za hospodarske naležnosće Kay Ritter w zdźělence. Jeho frakcija budźe wšelke argumenty nětko wuhódnoćeć. SPD, partnerka koalicije, zhladuje wo tójšto pozitiwnišo na słyšenje. „Kubłanski čas je wažny impuls za zesylnjenje čestnohamtskeho dźěła a ciwilneje towaršnosće“, rjekny Gerald Eisenblätter, městopředsyda frakcije SPD. Namjet wo zakonju za kubłanski čas běchu zašły měrc jako ludowy namjet do krajneho sejma zapodali. Wón ma ludźom garantować, zo smědźa sej dźěłopřijimarjo dohromady pjeć płaćenych dnjow dowola wob lěto za dalekubłanja wužadać. Zwjazk dźěłarnistwow, politiskich stronow kaž tež cyrkwinskich, swobodnych a socialnych zwjazkow bě za to wjace hač 55 000 podpismow nahromadźił. CDU a SPD běštej so na tři dny kubłanskeho časa dojednałoj.