Dr. Hartmut Leipner do prezidija organizacije FUEN woleny
Bozen (SN/BŠe). Hłowna zhromadźizna Federalistiskeje unije europskich narodnych mjeńšin (FUEN) kónc tydźenja w italskim měsće Bozenje steješe cyle w znamjenju wólbow. Předwčerawšim dopołdnja bu wólbna komisija, mjez druhim z jednaćelku Domowiny Judit Šołćinej, powołana. Cyłkownje 261 hłosow delegowanych na kongresu w Južnym Tirolu bě k dispoziciji.
Za wólby noweho prezidenta běchu so tři wosoby zwólniwe wuprajili. Kandidata z Južnoschleswigskeje Jensa A. Christiansena podpěrachu štyri mjeńšiny z Němskeje a so zjawnje za njeho wuprajichu. Wón bě 10 lět generalny sekretar danskeho kulturneho třěšneho zwjazka Sydslesvigsk Forening (SSF), je wulku syć tworił a móže dźěło prezidija z nowymi impulsami wobohaćić, běchu sej přezjedne. Dalšej kandidataj běštaj Gösta Toft z němskeje mjeńšiny w Danskej a Olivia Schubert z němskeje mjeńšiny w Madźarskej. Ze 180 hłosami je wona wólby wo zastojnstwo prezidentki jasnje dobyła a přiwza je z wulkim dźakom.
