Drježdźany (dpa/SN). Zwjazkowy kancler Friedrich Merz (CDU) ma wšelakorosć zwjazkowych krajow za wosebitu sylnosć Němskeje. Dźakowano jězbje po zwjaz­kowych krajach nazhonja zhromadnosće a wužadanja, kotrež maja so zmištrować, rjekny Merz na swojim wčerawšim nastupnym wopyće w sakskej Drježdźanskej statnej kencliji.

Merz chwaleše Saksku jako na tradicijach bohatu, ale zdobom modernu industrijnu městnosć. Wón potwjerdźi, zo je zwjazkowemu knježerstwu wutwar wobchadneje infrastruktury wosebje wažny. W tym zwisku witaše zwjazkowy kancler planowany twar noweje moderneje železniskeje čary z Drježdźan do Prahi kaž tež wutwar wobstejaceje čary z Drježdźan do Zhorjelca a dale do Wrócławja. Wosebje trasa do Prahi njeje hišće w dosahacej měrje financowana. Wo tym chcył Merz hišće raz w zwjazkowym knježerstwje w Berlinje rěčeć, wón přilubi.