W juhočěskich Domažlicach klinči instrument z Cyrkwje Marje a Marty

Domažlice (SN/LuNo) Štóž chce jimace prózdninske dyrdomdejstwo dožiwjeć, ma na juhu Čěskeje dosć dobru šansu za to. Njedaloko mjezy k Bayerskej namaka zajimc ze Serbow w Domažlicach (němsce Taus) wosebitosć, na kotruž smě hordy być. Na zwóńcy tamnišeje ewangelskeje bratrowskeje cyrkwje wisa mjenujcy Budyski zwón z 19. lětstotka. Wón waži 250 kilogramow a je do wysokosće a šěrokosće stajnje někak 75 cm wulki.

Zwón bu prěnjotnje zdźěłany za staru Cyrkej Marje a Marty w Budyšinje, hdźež je wot lěta 1830 wisał. Jeho zawěsnjenje sta so na termin tehdyšeho swjedźenja třistalětneho wudaća Augsburgskeje konfesije w Němcach. Tohodla nańdu so na nim grawury z podobiznomaj Martina Luthera a Philippa Melanchthona kaž tež němski napis „Bóh z nami“. Zwón je zwonar Friedrich Gruhl njedaloko Budyšina w Małym Wjelkowje, wsy z dołhej bratrowskej tradiciju, z turkowskeje třělbiny zhotowił.