Po dwělomnych rozsudach kanclera žadaja sej konferencu wokrjesow

Budyšin/Berlin (SN/mb). „Mjerzam so na komunikaciju předsydy CDU a zwjazkoweho kanclera“, praji Steffen Roschek. Jako předsyda Budyskeho wokrjesneho zwjazka CDU wón hižo wo diplomatiske słowa njerodźi. Štož je Friedrich Merz hladajo na wuměnu načolneho personala zwjazkoweje politiki ignorujo bazu strony naparał, łužiskeho politikarja słyšomnje rozhorja. Najebać dowol je předewzaćel we wobłukomaj IT a lětarstwa wčera wobšěrnje na naprašowanje Serbskich Nowin wotmołwił. Předewšěm hněwa jeho wotwołanje ministerki za sport a čestne zastojnstwo, Christiane Schenderlein ze Sakskeje, kotraž je wotnětka parlamentariska statna sekretarka w ministerstwje za strowotnistwo a so z tym hižo na posedźenjach kabineta njewobdźěla. Nimo zwjazkow sporta je tutón rozsud Merza tež sakski ministerski prezident Michael Kretschmer wótře kritizował.