Barcelona (SN). Přećiwo katalanskimaj online-nowinomaj VilaWeb a La Directa, kotrejž přisłušatej Europskemu zjednoćenstwu dźenikow w regionalnych a mjeńšinowych rěčach (MIDAS), je španiski Zarjad za škit datow AEPD chłostanske jednanja zahajił. Wo tym je VilaWeb čłonow MIDAS minjeny pjatk w nowinskej zdźělence informowała. Přičiny za to su kritiske rozprawy wobeju medijow wo statnych zastojnikach policije, kotřiž su z wopačnej identitu mjez druhim skupiny aktiwistow wuskušowali, kiž za njewotwisnosć Katalanskeje wojuja.

Wotkryła běše to redakcija nowiny La Directa w swojich rešeršach hižo w lěće 2022. W regionje kołowokoło města Valencia su policajscy zastojnicy wjacore měsacy abo samo lěta katalanske hibanje za njewotwisnosć systematisce infiltrěrowali. Rozprawy wo tym wozjewichu tež VilaWeb a dalše medije a nastorčichu z tym politisku debatu. Wjacore naprašowanja su španiscy parlamentariscy zapósłancy w tutym zwisku na knježerstwo stajili a w katalanskim regionalnym parlamenće je so přepytowanski wuběrk z temu zaběrał.