Wobchadny minister Bilger: Financneje podpěry Zwjazka njebudźe

Hohenschwangau/Drježdźany (dpa/SN). Na swoju ministersku konferencu su so wobchadni ministrojo zwjazkowych krajow minjenej dnjej w Hohenschwangauwje zešli. Postajowaca tema diskusijow běše bjezdwěla nuza krajow hladajo na financowanje regionalneho železniskeho wobchada. Zo su komunalne wudawki za to lětsa masiwnje stupali, njezwisuje jenož z energijowej krizu a wyšimi personalnymi kóštami.

Po wusudźe Europskeho sudnistwa (EuGH) lětsa w měrcu je Zwjazk swoju hornju mjezu płaćiznow mawty za wužiwanje kolijow w bliskowobchadźe zběhnyć dyrbjał. Za wudźeržowanje zamołwite předewzaće DB InfraGO, kotrež Němskej železnicy přisłuša, smědźeše mawt lětnje jenož wo kruće postajenu sadźbu zwyšić, lětsa wo 3 procenty. Po tym zo běše InfraGO na EuGH wuspěšnje skoržiła, žada sej wone za lětsa wo 23,5 procent wyšu mawt a to samo dodatnje wot spočatka lěta. Sakske wobchadne zaměrowe zwjazki maja tohodla něhdźe 95 milionow eurow přidatnych kóštow, sćelak MDR wčera zdźěli.