1 100 wobdźělnikow komunikaciju w nuzowym padźe trenowało

Wuskidź (SN/StŠ). Předstajće sej slědowacu situaciju: Ćahaj – w jednym sedźa ludźo, druhi je z pancerami nakładowany – do so zrazytej. Wjace hač 50 ludźi so při tym zrani. Problem za wuchowanske mocy: Městnosć njezboža je ćežko přistupna a nimo toho je mobilna syć wupadnyła. Runje tajki scenarij su wot wutory do wčerawšeho w Mužakowskej holi na zwučowanišću wójska blisko Wuskidźe simulowali a za to trenowali. Wjace hač 1 100 wosobow bě wobdźělenych, mjez nimi policija, wójsko, wohnjowa wobora, techniski pomocny skutk a wězo wuchowanska słužba.