Budyšin (SN). Tesla pyta tuchwilu so hodźace stejišćo za twar jednoho z prě­nich europskich zawodow Giga Factory, w kotrychž maja so produkować wulke mnóstwa modernych litiumo-ionowych bańkow a baterijow za elektroawta a sta­cionarne milinowe składy. „To je šansa w prawym času za strukturnu změnu we Łužicy. Njesměli ničo skomdźić, tajku firmu k nam dóstać.“ Takle pisa dr. Měrćin Krawc, předsyda SPD w Budyšinje a sam powołansce dźěłacy we wobłuku inowatiwnych energijowych technikow, w nowinskej zdźělence iniciatiwy Serbski sejm, kotraž SN předleži. „Sym za to hižo zwisk k sakskemu hospodarskemu ministerstwu nawjazał. Statne spěchowanje tajkeje wulkoinwesticije móhło paralelnje k mnohim projektam w hórnistwje dźěłacym časowje bliske wurjadne perspektiwy skićić.“ Hanzo Wylem-Kell, předsyda Łužiskeje aliancy a tohorunja předewzaćel we wobłuku solarneje a skła­dowanskeje techniki, měni: „Kompetency w chemiji, awtomatizaciji abo wuporjedźenju, kotrež w brunicowych jamach a milinarnjach maja, tworja za to najlěpše wuměnjenja.“

Berlin (dpa/SN). Po płaćiwych nowych sankcijach přećiwo Iranej warnuje němski zwjazkowy wonkowny minister Heiko Maas (SPD) před přiwótřenjom konflikta a hrožacym chaosom w krizowym regionje. „Mamy to za zmylk, nuklearne zrěčenje z Iranom spušćić“, praji wón dźensa w nowinje Passauer Allgemeine. Zrěčenje njeje perfektne, ale lěpša alternatiwa, hač scyła žane njeměć. W lěće 2015 wotzamknjene dojednanje ma wuwiću iranskeje atomoweje bomby zadźěwać. Za to měli zapadne kraje sankcije zběhnyć a tak mjez druhim inwesticije w Iranje zmóžnić. Maas wojuje dale za zrěčenje, dokelž wone tež wěstotnym zaměram słuži. Iran dźě leži w susodstwje Europy. Izolacija Irana móhła fundamentalistam pohon być.

W Budyskim wokrjesu lěsy ze stražniskich wěžow wobkedźbuja

Židźino/Wojerecy (dpa/SN). Ze 36,8 stopnjemi nad nulu su minjeny tydźeń we Wojerecach nowy horcotny rekord Sakskeje naměrili. Lěsny inženjer Thomas Sobczyk hlada z wulkimi starosćemi na jasne módre njebjo. „Zo hižo tak zahe lisćo ze štomow pada, nas starosći. Dlěje trajaceje horcoty je na zemi lědma hišće wegetacije. Měšeńca wotpadaneje jehliny, zeschnytych łopjenow, wrjosa a trawy móže so při tajkej horcoće spěšnje za­palić“, wujasnja sobudźěłaćer delnjeho lěsneho zarjada Budyskeho wokrjesa.

Thomas Sobczyk steji w lěsu pola Židźi­noho, tři kilometry wot Wojerec zdalenym. Na mnohich městnach dyrbješe wón za wobłuk, kotryž zamołwja, najwyši schodźenk stracha lěsneho wohenja postajić. 28 tajkich wohenjow pjelni­ dotalnu lětušu statistiku. Loni bě jich w dwanaće měsacach wšo dohromady 18. Lěs so tuž prawdźepodobnje žehli.

Zaso raz warnuja wědomostnicy před sćěha­mi klimoweje změny. Skeptikarjo wšak najnowše dopóznaća znowa wotpokazuja – hdyž nic impulsiwnje, da snano na měnjenja móličkeje mjeńšiny fachowcow so złožujo. Wothladajo wot wěsteje horstki pumpotacych politikarjow a jich přiwisnikow, kotřiž fenomen dospołnje prěja a jón jako dalokowuchodne wu­namakanje wopisuja, dźe w zjawnej diskusiji runje hladajo na tuchwilnu hor­cotu a suchotu hłownje wo prašenje, hač a w kotrej měrje čłowjek móžnu katastrofu zamołwja. Wotwidźeć tež je, zo – dožiwimy-li přichodny dešćikojty a chłódniši tydźeń – diskurs do eksaktnje napře­ćiw­neho směra poběži. Fakt je: Přerězna temperatura wobstajnje stupa, konsekwency su fatalne. Poprawny problem w tym zwisku: Chcemy so wo tym rozmołwjeć, štó je na wobstejnosćach wina, abo wo tym, štó móže na nich ewentualnje (hišće) něšto změnić? Bosćan Nawka