Mnichow (dpa/SN). Jako prěni zwjazkowy kraj je Bayerska dźensa dwělomny program kótwicowe centrumy zahajiła. Po migraciskim masterskim planje zwjazkoweho ministra za nutřkowne naležnosće Horsta Seehofera (CSU) měli centrumy jednanja azyla dla pospěšić a tak tež wupokazanje ludźi, kotřiž nimaja žane prawo w Němskej wostać. Tamne zwjazkowe kraje najprjedy raz žane centrumy njewutworja. Na sydom stejnišćach w Bayerskej su zamołwići centrumy wutworili.
Nowe prawidła za přićah
Berlin (dpa/SN). Wot dźensnišeho płaća nowe prawidła za přićah swójbnych w Němskej přebywacych ćěkancow z wobmjezowanym škitnym statusom. Tak smědźa nětko zaso bliscy přiwuzni do Němskeje přińć. Předwidźane pak je, zo njeměło po cyłej Němskej měsačnje wjac hač 1 000 wosobow přińć. Dorosćeni móža nětko swojich mandźelskich a njepołnolětne dźěći k sebi wzać, njepołnolětni ćěkancy swojich staršich.
Staršiski popłatk hižo njeje
Berlin (dpa/SN). Najebać dale a wjace hłosow, kotrež su za spěšnu financnu pomoc buram, wobstawa zwjazkowa ministerka za ratarstwo Julia Klöckner na tym, „wočaknyć dokładnu bilancu žnjow. To su pjenjezy dawkipłaćerjow, a trjebamy najprjedy reprezentatiwne daty.“
Fachowcy ministerstwa, Zwjazka a krajow běchu wčera w Berlinje wo škodach suchoty dla wuradźowali. Je jasne, zo su ratarjo w Němskej na najwšelakoriše wašnje potrjecheni. Horce wjedro pak połoženje ekstremnje přiwótřa. Dźensa chcyše so zwjazkowy kabinet schadźować a sćěhi suchoty rozjimać, wobzamknjene pak po wšěm zdaću ničo njebudźe. Poprawom su najprjedy raz zwjazkowe kraje zamołwite. Su-li škody „narodneho rozměra“, móže so Zwjazk wobdźělić. Tomu běše w lěće 2003 tak. Hakle kónc awgusta, hdyž budu konkretniše ličby předležeć, chce Zwjazk wo financnej pomocy rozsudźić.
Berlin/Bergheim (dpa/SN). Hižo dlěje trajaceho horceho lěća dla je so přetrjeba energije w Němskej w prěnich šěsć měsacach lěta wo jedyn procent znižiła. Bjez wliwa wjedra wšak by so wona porno lońšemu wo 1,5 procentow zwyšiła. Dźěłowa skupina energijowe bilancy je swoje wobličenja wčera w Berlinje wozjewiła. Hišće w prěnich třoch měsacach lěta pak bě přezyma, zo je přetrjeba energije w tym času wo pjeć procentow rozrostła.
Zdobom pomjeńšiła je so přetrjeba tepjenskeho wolija, a to samo wo dwanaće procentow. Tež kamjentneho wuhla bu ze 14 procentami jasnje mjenje přetrjebane. Hladajo na brunicu je to minus wo tři procenty. Dobyćerjo pak běchu wobnowjomne energije. Tam registrowachu fachowcy rozrost štyrjoch procentow.
Přiwšěm zawěsćeja fosilne energije najwjetši dźěl zastaranja z milinu w Němskej, nimale 80 procentow. Mjenje wužiwanej wolij a wuhlo a wjace wužiwane wobnowjomne energije a płun pak su po trochowanju dźěłoweje skupiny mjenje wustorka wuhlikoweho dioksida wo něhdźe tři procenty wuskutkowali.
Při twarskich dźěłach kóčku přewidźeli a pod garažu mylnje sobu zabetonowali su dźěłaćerjo w badensko-württembergskim Brettenje. Jako wobydlerjo tele dny stajnje zaso mjawčenje słyšachu, su za kóčku pytali. A zawčerawšim wječor ju nańdźechu. Hibać drje so wona hišće móžeše, přez wusku škałbu pak so sama njewuswobodźi. Škałbu su na to najprjedy trochu powjetšili, zo bychu Maine-coon-micku z picu a wodu zastarali. Wčera ju skónčnje wuswobodźichu.
Za přistajenych pohrjebnych předewzaćow płaći to samsne kaž za wšitke tamne powołanja, w kotrychž maja ludźo ćežke zběhać. To postaji nětko Stuttgartske socialne sudnistwo. We wosebitym padźe dźěše wo přistajeneho pochowanskeho instituta, kiž je při zběhnjenju ćěła z łoža trawmu přezběhnjenja poćerpjeł. Tydźenje njemóžeše wón bolosćow dla swoje dźěło wukonjeć. Njezbožowa kasa pak nochcyše płaćić. Nětko ma to nachwatać.
Praha (dpa/SN). Skupina čěskich politikarjow je znowa wot Ruskeje anektowanu ukrainsku połkupu Krim wopytała. Mjez nimi běchu europski zapósłanc Jaromír Kohlíček a dalši wysocy zastupjerjo komunistiskeje strony KSČM. Ukraina wopyt wótrje kritizuje a ma jón za ranjenje mjezynarodneho prawa. Dale hrozy kraj přećiwo wobdźělenym politi- karjam ze spektrumom sankcijow.
Wobskorženeho wuwinili
Düsseldorf (dpa/SN). W procesu bomboweho nadpada při Düsseldorfskim dwórnišću Wehrhahn je krajne sudnistwo 52lětneho wobskorženeho dźensa wuwiniło. Statne rěčnistwo bě sej jastwo na čas žiwjenja žadało. Mužej wumjetowachu pospyt mordarstwa w dwanaće padach hidy na cuzych dla. Při nadpadźe před wosomnaće lětami bu dźesać připućowarjow předewšěm židowskeho pochada zranjenych. Jedne njenarodźene dźěćo je zemrěło.
W juliju wjace bjezdźěłnych
Berlin (SN/BŠe). Wjacori politikarjo FDP su so w zwjazkowym ministerstwje za wobchad a digitalnu infrastrukturu za stawom wažnych wobchadnych projektow wobhonili. Zapósłanc zwjazkoweho sejma Torsten Herbst zdźěli: „Hižo dźesać lět inwesticije Zwjazka do awtodróhow a zwjazkowych dróhow w srjedźnej Němskej woteběraja, a trend dale wobsteji. To njemóžemy akceptować, dokelž w ofensiwje wutwara zwjazkowych dróhow našu kónčinu njewobkedźbuja.“ Runje zwjazkowe dróhi w Sakskej, Saksko-Anhaltskej a Durinskej nimaja kwalitu a wukonliwosć wobchadnych zwiskow kaž na zapadźe Němskeje. Runje za zwjazanje wjesnych kónčin su tajke bytostne.
Tež hdyž je přichodnje wjace pjenjez za wobchadne inwesticije předwidźanych, njeje dawno hišće wotwidźeć, hač tež regiony wosrjedź Němskeje z toho profituja. To leži w rukach Zwjazka a planowanskich zarjadow na krajnej runinje. Torsten Herbst wšak zasadźa so zaměrnje za dalši wutwar zwjazkoweje dróhi B178 mjez Žitawu a Niederoderwitzom.
Z črijemi derje pjelnjeny kamor su paduši w Erfurće spakosćili. Tam bě žona minjenu sobotu přećahnyła. Dokelž njemóžeše wšitko naraz wotnjesć, je kamor w lifće stejo wostajiła. Jako so tón po jězbje do štyrnateje etaže zaso do přizemja nawróći, bě kamor fuk a z nim cyłych dwaceći porow čriji.
Naheho kolesowarja ze spěšnosću 47 kilometrow na hodźinu bě błyskač w Kielu zapopadnył. Policija je wobraz wozjewiła a na to skedźbniła, zo maja tež kolesowarjo spěšnosć wobkedźbować. Na spomnjenym wotrězku je dźě jenož 30 km/h dowolene. Błyskač bě muža, kiž měješe jenož nohajcy a črije wobute, njedawno w 23.14 hodź. lepił. Dokelž pak njewědźa, komu měli chłostanku słać, drje njetrjeba nahi kolesowar ze žanej pokutu ličić.
Ottmaring (B/SN). Klóštry a rjadnicy měli so po měnjenju patra Aloisa Schlachtera bóle za towaršnosć wotewrěć. „Swět měli přiwzać, kajkiž je, nic, kajkiž dyrbjał być“, rjekny rektor Misionskeho domu misionarow Drohotneje kreje w šwabskim putnikowanišću Maria Baumgärtle. Jako přikład mjenowaše pater Schlachter cyrkwinski azyl, kotryž móža tež rjady poskićeć, wón praji.
Kritizuje wotehnaća
Athen (dpa/SN). Ličba smjertnych woporow wulkich wohenjow w Grjekskej dla je na znajmjeńša 91 rozrostła. Dalše 25 wosobow je hišće zhubjenych, zdźěli wčera wječor rěčnica grjekskeje wohnjoweje wobory. Tuchwilu wuchadźeja tam z toho, zo budu hišće někotre dny trěbne, mortwych identifikować. Hakle potom budźe dóńt wšitkich zhubjenych jasny. Woheń bě tydźenja w dowolowym regionje Rafina wudyrił a wulke škody zawinował. Sudnistwo mjeztym přepytuje.
Kritizuja wopyt Erdoğana
Berlin (dpa/SN). Opozicija zwjazkoweho sejma planowany statny wopyt turkowskeho prezidenta Recepa Tayyipa Erdoğana wótrje kritizuje. Politikar Zelenych Cem Özdemir zwurazni, zo njeje Erdoğan normalny prezident, čehoždla njeměli jeho witać. Zastupowacy předsyda frakcije FDP Alexander Graf Lambsdorff ma wopyt za trěbny, ale žada sej jasne stejišćo němskeho knježerstwa. Předsydka frakcije AfD Alice Weidel pak wopyt cyle wotpokaza.
Prěnje wólby po lětdźesatkach