Brüssel (dpa/SN). Předań a konsum ilegalneje drogi kokaina w Europje přiběratej. Tole wuchadźa z najnowšeje kóždolětneje rozprawy wobkedźbowarnje Europskeje unije za drogi a drogowu chcyćiwosć. Rozprawu staj nawoda zarjad- nišća Alexis Goosdeel a nutřkowny komisar EU Dimitris Avramopoulos wčera w Brüsselu předstajiłoj. Po jeju słowach je čistota drogi přerěznje přiběrała. W mnohich městach su naposledk wjace powostankow kokaina we wopłóčkach zwěsćili hač lěta do toho. Tež ličba drogowych namakankow je přiběrała.
Najnowše daty złožuja so na lěto 2016. To su w Europskej uniji něhdźe 98 000 króć kokain namakali, štož wotpowěduje 70,9 tonam. „Přirunujo z lětom 2015 su zamołwići něšto wjace kokaina sćazali, ličba namakankow pak je jasnje rozrostła.“ Starosće načinjeja nowe syntetiske opioidy, kotrež su w USA za ćežku drogowu krizu zamołwite. Nimo toho maja pokazki na to, zo w Europje dźeń a wjace drogow produkuja. Wobkedźbowarnja drogow z hłownym sydłom w Lissabonje daty jenož podawa. Bój přećiwo drogam je wěc jednotliwych čłonow EU.
Bronza, slěbro a nětko snano złoto? Studenća Lipšćanskeje Wysokeje šule za techniku wuličeja sej za Robocup 2018 dosć dobre šany na koparski titul. 15. junija wotleća woni do kanadiskeho Montreala. Sobu změja dźewjeć małych roboterow, kotrež potom na kumštnym trawniku kopańcu hraja. Wotpowědnu software běchu studenća sami wuwili. Na dotalnych swětowych mišterstwach su sej hižo bronzowu a slěbornu medalju zawěsćili.
W myjerni awtow tčacy wostał je rentnar w Bochumje. Wohnjowa wobora dyrbješe muža wuswobodźić. Tón bě z awta wulězł, jako připrawa hižo dźěłaše. Tak dósta so muž z nohu do šćětkow, kotrež kolesa awta rjedźachu. Ze železnej žerdźu móžachu wobornicy rentnarja po dźesać minutach wuswobodźić a dowjezechu jeho do chorownje.
Berlin (dpa/SN). Afera njewoprawnjenych přizwolenjow azyla w Zwjazkowym zarjedźe za migraciju a ćěkancow dla je dźensa zapósłancow zwjazkoweho sejma zaběrała. Tam debatowachu wo žadanju FDP, zasadźić přepytowanski wuběrk k wuswětlenju. Druhe strony hišće wahaja, dokelž nochcedźa z AfD we wuběrku hromadźe dźěłać. Dalša tema bě planowane noworjadowanje, kotrež zmóžnja we wukraju bydlacym swójbnym ćěkancow, do Němskeje přińć.
Turkojo w Němskej wola
Köln (dpa/SN). Něhdźe 1,4 miliony wólbokmanych z turkowskim wupokazom smědźa wot dźensnišeho w Němskej swój hłós za wólby parlamenta a prezidenta w Turkowskej wotedać. Kaž wjacore turkowske konsulaty zdźěleja, su wólbne lokale hač do 19. junija přistupne. Wólbnobojowe zarjadowanja turkowskich politikarjow w Němskej wostanu přiwšěm zakazane. Z wólbami chce prezident Recep Tayyip Erdoğan swój prezidialny system zwoprawdźić, kotryž jemu wjace mocy spožča.
Wočakuja Seehofera
Drježdźany/Wrócław (dpa/SN). Sakska chcyła so ze susodnej Pólskej na polu hospodarstwa a wědomosće lěpje splesć. Z teje přičiny je so hospodarski minister Martin Dulig (SPD) wčera do susodneho kraja podał. Jeho přewodźa delegacija, wobstejaca ze zastupnikow Sakske hospodarstwo spěchowaceje towaršnosće, Lipšćanskich wikow, europskeho města Zhorjelca/Zgorzeleca kaž tež sakskeje industrije. W srjedźišću programa steja politiske rozmołwy, zhromadne dźěło na železniskim a móžnosće kooperacije na kulturnym a kreatiwnym polu, kaž ze zdźělenki hospodarskeho ministerstwa w Drježdźanach wuchadźa.