To a tamne (01.06.18)
Zwěrjacu pomoc je stražnistwo Wojerowskeho zwěrjenca minjeny kónc tydźenja dóstało. W nocy na njedźelu bě so pjeć wosobow z Wojerowskeje kónčiny do coologiskeje zahrody zadobyło a wótře wołajo po terenje běhało. Na to reagujo započachu šěre čaple škrěčeć. Sobudźěłaćerjej města, kiž runje nimo běžeše, njewšědna hara napadny. Zadobywarjow wuhladajo wón policiju informowaše, kotraž skućićelow nachwilnje zaja. Nětko přepytuje kriminalna policija.
Agilny rój pčołkow je w Awstriskej wohnjowu woboru zaběrał. Tysacy pčołow bě so najprjedy na kolesu a potom na awće zaměstniło, kaž rěčnik wohnjoweje wobory w Kremsu, 80 kilometrow sewjernje Wiena, zdźěli. Za tajke situacije specielnje wukubłany wohnjowy wobornik pčołki popadny a přesydli, po tym zo bě je z wodu popryskał.
Region na kromje wójny
New York (dpa/SN). Eskalacija namocy mjez militantnymi Palestinjanami a Israelom pokazuje po měnjenju wosebiteho pósłanca UNO za Bliski Wuchod Nikolaja Mladenowa, zo je region „kóždy dźeń na kromje wójny“. Na wurjadnym posedźenju Bjezstrašnostneje rady UNO Mladenow mjezynarodnu zhromadnosć namołwješe, nadpady Palestinjanow na Israel zasudźić. Zdobom wón na to pokaza, zo steja ataki w direktnym zwisku z tydźenje trajacymi protestami Palestinjanow, při kotrychž běchu israelscy wojacy wjace hač sto demonstrantow zatřělili.
Muž z nožom bě ćěkanc
Sylne njewjedra ze zliwkami su wčera tež w Hornjej Łužicy kraj ...
Prěnje zakazy dieselowych awtow
Nowe cła USA drje wotwidźomne
Jamy dale njerozšěrjeć
Nowa debata wo zakónčenju wudobywanja brunicy wudyriła
Podstupim/Berlin (dpa/SN). Opozicionelna CDU w Krajnym sejmje Braniborskeje knježerstwowej koaliciji SPD a Lěwicy wumjetuje, zo nima za přichod łužiskeho brunicoweho regiona strategiju. „Ničo so njehiba“, nadběhowaše zapósłanc Dierk Homeyer wčera w aktualnej debaće knježerstwo. Kraj žada sej wot regiona ideje za strukturnu změnu a wot zwjazkoweho knježerstwa pjenjezy. „Štož přeco hišće pobrachuje, je koordinowaca ruka.“ Tež AfD knježerstwu wumjetowaše, zo ničo nječini.
Zapósłanc SPD Ralf Holzschuher rjekny, zo njeměła wot Zwjazka planowana brunicowa komisija jenož energijowu změnu nastorčić, ale tež dwěle ludźi chutnje brać. Kónc wudobywanja brunicy njesměł na škodu wobydlerjow w potrjechenej kónčinje być. Krótko do spočatka aktualneje hodźiny běchu zapósłancy zhonili, zo njeje zwjazkowe knježerstwo wčera, kaž poprawom planowane, wo zasadźenju komisije rozsudźiło.
„To njerozumju“
To a tamne (31.05.18)
Eksotiski had w bydlenju je podružnicu w Zhorjelskim nutřkownym měsće chětro wustróžił. Zwěrjo so na balkonje słónčeše a skónčnje na ramik wokna zalěze, policija zdźěli. Alarmowani policisća skazachu fachowca, kiž hada jako njejědojteho juhoaziskeho wuža (Natter) identifikowaše. Kak bě so połdra metra dołhi had na balkon dóstał a komu słuša, dotal njewědźa. Nětko je zwěrjo najprjedy raz w Zhorjelskim zwěrjencu.
Za spektakularne wuchowanje dźěsća z balkona sławjeny migrant z Malija Mamoudou Gassama je w Francoskej dowolnosć přebywanja dóstał. Statny prezident Emmanuel Macron bě jemu to přilubił. Nětko ma wón francoske staćanstwo a dźěło pola wohnjoweje wobory dóstać.
Na přiměr so dojednali
Tel Aviv/Gaza (dpa/SN). Po eskalaciji namocy mjez militantnymi Palestinjanami a Israelom su so po informacijach radikalnoislamskeje milicy Hamas na přiměr bróni dojednali. Egyptowska bě při tym posrědkowała. Israel je mjeztym připowědźił, zo přiměr akceptuje, wostanje-li połoženje měrne. Wčera běchu Palestinjenjo wjace hač 70 granatow a raketow na Israel wotřělili. Wottam reagowachu z nalětami na Gazaske pasmo.
Za intensiwne rozmołwy
Paris (dpa/SN). W zwadźe wo planowane chłostanske cła USA pytatej Němska a Europska unija krótko do skónčenja ameriskeje přechodneje doby dale za rozmołwami. Na kromje konferency Organizacije za hospodarske zhromadne dźěło (OECD) w Parisu chcyše so za wikowanje zamołwita komisarka EU Cecilia Malmström dźensa z wikowanskim ministrom USA Wilburom Rossom zetkać. Tež zwjazkowy hospodarski minister Peter Altmaier (CDU) prócuje so na konferency OECD wo „intensiwne rozmołwy“.
Městna hač do 2023 wěste
