„W dźunglu so zašmjataja“

Donnerstag, 27. September 2018 geschrieben von:

Na konferency kajkosće Łužicy nastupajo strukturnu změnu wobjednawali

Choćebuz (dpa/SN). Wotewrjeny być za eksperimenty, wjetše předewzaća přićahować a so wot wubědźowarjow wotbłyšćować, su jenož někotre namjety za strukturne wuwiće we Łužicy. Na kon­ferency dźěłarnistwa hórnistwo, chemija a energija (IG BCE) zawčerawšim w Choćebuzu wuradźowachu zajimcy, kak móhli inwestorow do regiona wabić. Předewšěm měła so dobra infrastruk­tura wuwić.

Předewzaćelski poradźowar Hans Gerd Prodoehl namołwješe zamołwitych wulke wizije wuwić. Tak wupraji so wón za wosebitu hospodarsku kónčinu, hdźež měli wosebite ramikowe wuměnjenja wutworić, kotrež nihdźe druhdźe nimaja. Tole je so na Sakskej stronje hižo raz diskutowało. Zdobom poradźowar kritizowaše, zo je we Łužicy přewjele iniciatiwow, kotrež so ze strukturnej změnu zaběraja. „W dźunglu institucijow so inwestorojo zašmjataja“, wón wuzběhny.

To a tamne (27.09.18)

Donnerstag, 27. September 2018 geschrieben von:

Swoje mjeno z něčim pozitiwnym zwjazować, a nic z grawoćiwym hurikanom, kotryž bě srjedź septembra na juhowuchodźe USA howrił, chcyše štyrilětna holčka Florence. Tuž chodźeše wot domu k domej a zběraše za wopory hurikana dary. Powěsć w socialnej syći Facebook z wobrazom holčki je k tomu wjedła, zo su ludźo po cyłym kraju tójšto darow nahromadźili. Tuž móže so Florence nětko nad jeje mjenom zawěsće zaso wjeselić.

Njewšědny zwěrjeći wopyt mějachu zapósłancy Europskeho parlamenta w Brüsselu. Tam bě pony z mjenom Dinky do domu přišoł, kiž přewodźeše slepu awtorku Monique Van den Abbeel. Z wopytom pokazachu na to, zo hodźa so nimo psow tež druhe zwěrjata, kiž zamóža ludźom pomhać. Tuž měli přichodnje wšitke ­zwěrjata přistup k zjawnym twarjenjam měć, štož měli zakonsce zrjadować.

Prašenje dowěry so njestaji

Mittwoch, 26. September 2018 geschrieben von:

Berlin (dpa/SN). Po nowowólbach šefa frakcije unije, hdźež je wčera Ralph Brinkhaus (CDU) překwapjacy wjetšinu hłosow dóstał, je wiceprezident CDU Armin Laschet wumjetowanja strony FDP wotpokazał, kotřiž sej žadachu zwjazkowej kanclerce Angeli Merkel (CDU) pra­šenje dowěry stajić. Ralph Brinkhaus je připowědźił kanclerku podpěrać. Hladajo na zastojnstwo šefa frakcije je jenož kandidował, dokelž chce so wo čerstwy stil a nowe ideje postarać.

Wobzamknjenja njedosahace

Berlin (dpa/SN). Zwjazkowy sejm je dźensa bilancu bydlenskeho wjerška diskutował, hdźež su minjeny tydźeń naprawy přećiwo přemało bydlenjam a přećiwo zwyšenju podruže wobzamknyli. Koalicija unije a SPD je wo aktualnu hodźinu w sejmje prosyła. Dokelž njesahaja SPD wobzamknjenja daloko dosć, chce hišće wjace naprawow přesadźić. Na přikład njeměła so podruž pjeć lět dołho zwyšić.

Trump posedźenje nawjeduje

Za Zhorjelski zawod wuspěch

Mittwoch, 26. September 2018 geschrieben von:

Berlin/Zhorjelc (SN/BŠe). Planowany wottwar dźěłowych městnow pola koncerna Siemens njebudźe tajki kaž poprawom wočakowany. Na stejnišću w Berlinje chcychu 870 dźěłowych městnow šmórnyć. W přichodnymaj lětomaj pak budu tomu 700, předewzaće zawčera­wšim zdźěli. Po cyłej Němskej chcedźa 2 900 dźěłowych městnow wottwarić, štož je 500 mjenje hač předwidźane. To je wuslědk jednanjow mjez dźěłodawarjom a zastupjerjemi dźěłopřijimarjow. Dojednane wuslědki su minjenu póndźelu podpisali.

Kaž dźěłarnistwo IG metal wujasni, je Siemens swoje plany chětro změnił, při čimž su zawodni radźićeljo stejnišćow a dźěłarnistwo proces aktiwnje přewodźeli. Předewšěm na wuchodźe Sakskeje docpěchu wulki wuspěch, wšako budźe Zhorjelski zawod z tuchwilu něhdźe 960 dźěłowymi městnami zdźeržany. Poprawom bě planowane jón zawrěć, štož je wulke protesty wuwabiło. Hižo w meji bě zawrjenje stejnišća z blida.

Technologiju měli we Łužicy bórze zasadźić

Mittwoch, 26. September 2018 geschrieben von:

Drježdźany/Choćebuz (dpa/SN). Technika so njesměrnje spěšnje dale wuwiwa. Před dwěmaj lětomaj diskutowachu fachowcy na konferencach hišće teoretisce wo nowej mobilnostandartnej technologiji z mjenom 5G. Na wčerawšim zarjadowanju 5G Summit w Drježdźanach móžachu nětko hižo prěnje prototypy přitomnym prezentować. Něhdźe 500 wědomostnikow a zastupjerjow industrije je so w stolicy Sakskeje mjeztym hižo třeći raz schadźowało.

Generaciska změna

Mittwoch, 26. September 2018 geschrieben von:
Što su personalne namjety na čole frakcije CDU hišće hódne, hdyž staj je sakski krajny předsyda a ministerski prezident Michael Kretschmer abo zwjazkowa předsydka a kanclerka Angela Merkel zapodałoj? To so prašeš po wčerawšimaj wólbomaj frakciskeho předsydy w Berlinje a Drježdźanach. Wězo su tajke wólby demokratiski proces a napřećiwny kandidat cyłu proceduru wožiwi. We woběmaj padomaj pak rozsudźi so wjetšina křesćanskodemokratiskich zapósłancow za generacisku změnu: Za Christiana Hartmanna nad Łobjom a za Ralpha Brinkhausa nad Sprjewju. Zawěsće budźe wětřik sylniši, kotryž Angeli Merkel z frakcije zwjazkoweho sejma mjezwoči duje. Abo je to hižo započatk kónca wěčneje doby Merkel w kanclerskim zarjedźe? Za saksku CDU je situacija wo wjele prekerniša: Dezaster lońšich wólbow zwjazkoweho sejma nima so při klětušich wólbach krajneho sejma wo­spjetować. Hač je Hartmann nětko prawy muž, ma so dopokazać. Axel Arlt

Hladanje je a wostanje wužadanje

Mittwoch, 26. September 2018 geschrieben von:

Wojerecy (CRM/SN). „Hižo dźensa je přibližnje 3,5 milionow hladanja potrěbnych w našim kraju žiwych. Wužadanja přiběraja. Tuž je wažne na městnje so informować a stajnje zaso struktury k optimalnemu hla­danju potrěbnych pruwować a polěpšić“, rěkaše w přeprošenju Žónskeje unije CDU w Budyskim wokrjesu na zjawny forum minjeny štwórtk do Wojerowskeho zarjadniskeho domu LebensRäume (SN informowachu). Jako bywša čłonka wuběrka za dźěło a socialne w zwjazkowym sejmje znaje Marja Michałkowa materiju hladanja a wotpowědne zakonje dosć derje. Wažne pak je tohorunja jich přesadźenje w jednotliwych zwjazkowych krajach runje tak kaž jich dalewuwiće na přitomnostne a přichodne wužadanja.

To a tamne (26.09.18)

Mittwoch, 26. September 2018 geschrieben von:

Swojeho psyka njepušćił a z nim po nahłej skłoninje při bayerskim jězorje Königssee 40 metrow dele padnył je 46lětny muž z Berlina. 37lětna přewodnica chcyše mužej pomhać, so tohorunja suny a wosta tčacy. Hórska straža dyrbješe znjezboženeju wuchować a kaž wčera zdźěli, njejstej so žona a psyk zraniłoj. Muž pak dyrbješe do chorownje.

W hódnoće něhdźe jedyn milion eurow ma so 3. oktobra bleša whiskyja přesadźować, zdźěli předwčerawšim znaty awkciski dom Bonham. Cyłkownje dwanaće blešow 60 lět zrawjeneho whiskyja palernje Marcellan na sewjeru Šotiskeje scyła eksistuje. Etiket je italski wuměłc Valerio Adami naćisnył. Jedna bleša whiskyja bu lětsa hižo w Hongkongu ­za něhdźe 910 000 eurow přesadźena. Kelko z dwanaće blešow scyła hišće eksistuje, je njejasne.

Wola noweho šefa frakcije

Dienstag, 25. September 2018 geschrieben von:

Berlin (dpa/SN). Po 13 lětach w zastojn­stwje ma so šef frakcije CDU w zwjazkowym sejmje Volker Kauder (CDU) dźensa na wólbach w Berlinje přećiwnikej stajić. Wuspěch jeho naměstnika a kandidata wo zastojnstwo Ralpha Brinkhausa (CDU) móhła překwapjenka być, ale zdobom na krizu w kruhach CDU pokazać. Zwjazkowa kanclerka Angela Merkel (CDU) Kauderej jara dowěrja. 69lětny je hižo tak dołho předsyda frakcije, kaž wona kanclerka.

Bamž dźensa w Estiskej pobył

Talinn (dpa/SN). Na kóncu jězby po Baltikumje wopyta bamž Franziskus dźensa Estisku. Tam zetkaše so z prezidentku Kersti Kaljulaid, młodostnymi a sobudźěłaćerjemi dobroćelstwowych organizacijow. Prjedy hač chcyše so wón dźensa wječor do Roma nawróćić, swjećeše na Naměsće swobody Božu mšu. Po informacijach Vatikana bydla w Estiskej něhdźe 5 000 katolskich wěriwych, štož wotpowěduje něhdźe 0,5 procentow ludnosće.

Wuskutki hižo čujomne

Na socialnu znjesliwosć dźiwać

Dienstag, 25. September 2018 geschrieben von:

Halle/Kerpen (dpa/SN). Socialnje znjesliwe zakónčenje wudobywanja brunicy trjeba wosebje na wuchodźe Němskeje bjezmało wulkich prócowanjow. Industrija a zjawna ruka měłoj znajmjeńša 60 miliardow eurow nałožić, zdźěli Saksko-Anhaltski ministerski prezident Reiner Haseloff (CDU) w Halle, hdźež je so wčera wuhlowa komisija schadźowała. Pjenjezy su předewšěm za wutwar narunanskich dźěłowych městnow a za polěpšenje infrastruktury trěbne. Zwjazkowe knježerstwo je dotal 1,5 miliardow eurow pomocy wšitkim třom němskim brunicowym rewěram připowědźiło, ke kotrymž tež Łužica słuša.

W Halle mějachu potrjechene přede- wzaća, iniciatiwy a zwjazki srjedźoněmskeho rewěra składnosć swój wid na zakónčenje wudobywanja wuhla brunicowej komisiji předstajić. Zastupjerjo pokazachu na to, zo dožiwichu hižo spočatk 90tych lět sćěhi strukturneje změny, štož njeměło so wospjetować. Hižo 11. oktobra chce so komisija we Łužicy zeńć a so starosćam potrjechenych wěnować.

Anzeige

  • Tež lětsa je Domowina na swjedźenskim zarjadowanju wjacorym čestnohamtsce skutkowacym Serbam Myta Domowiny, Čestne znamješko Domowny a tohorunja čestne čłonstwo třěšneho zwjazka spožčiła.  Mjez wuznamjenjenymi běchu zastupjerjo wjacorych generacijow.