Berlin (dpa/SN). Zo móhli so zwiski w prawicarskim ekstremizmje w přichodźe lěpje wujasnić, maja so zadźěwki za slědźenje k financnym prudam ekstremistiskich skupinow změnić. Za to přihotuja w zwjazkowym nutřkownym ministerstwje zakoń, rěkaše dźensa z ministerstwa. Dotal smě so jenož přećiwo podhladnym přepytować, jelizo wuchadźa ze skupiny namóc. W přichodźe ma so tu přidatnje potencial wohroženja nastupajo swobodny demokratiski zakładny porjad zapřijeć.
Wulkej škodźe zadźěwał
Oberhof (dpa/SN). Šofer nakładneho awta je hromadźe z palacym připowěšakom šěsć kilometrow dołho přez tunl Rennsteig jěł. Nakładne awto je so w tunlu započało palić, zdźěli policija. Jako šofer woheń hašeć njemóžeše, je wón rozsudźił, z tunla jěć, tak zo je hóršej škodźe zadźěwał. Po informacijach policije bě so woheń wčera wječor z wobruče wuchadźejo na cyły připowěšak rozpřestrěł.
Wjace nabiwanskich stacijow
Berlin (dpa/SN). Reforma zwjazkoweho zakonja k datowemu škitej ma prawa přetrjebarjow napřećo Schufje zesylnić. Z wotpowědnym naćiskom zakonja, kotryž je kabinet zawčerawšim schwalił, reaguje zwjazkowe knježerstwo na wusud Europskeho sudnistwa (EuGH). Najwyše europske sudnistwo bě zwěsćiło, zo je pruwowanje bonity přetrjebarjow dowolene, ale při tym měli so hranicy za zwěsćenje datow dodźeržeć. K datam, kotrež njesmědźa so po naćisku zakonja přichodnje wužiwać, zo móhli předewzaća płaćenjakmanosć ludźi posudźować, słušeja mjez druhim bydlenska adresa, mjeno abo na wosobu so poćahowace daty z wužiwanja socialnych syćow. Tež bankowe daty wosobow njesmědźa so hižo nihdźe podać.
Pozadk rozsuda EuGH z decembra běštej dwaj padaj z Němskeje. W jednym padźe bě žona skoržiła, kotrejž běchu kredit zapowědźili. Wona namołwi Schufu, zapis wotstronić a přistup k datam přizwolić, čemuž Schufa njewotpowědowaše.
Drježdźany (dpa/SN). Sakski krajny sejm chcyše dźensa na wosebitym posedźenju wo zasadźenju přepytowanskeho wuběrka k wobchadźenju ze spěchowanskimi srědkami w socialnym ministerstwje wothłosować. Přepytowanski wuběrk dyrbi na iniciatiwu frakcije AfD nastać. Pozadk toho je wosebita rozprawa krajneho zličbowanskeho zarjada. Tón bě so na tym postorkował, kak je so spěchowanska směrnica za integraciju ćěkancow zwoprawdźiła a w tym zwisku sakskemu socialnemu ministerstwu njezakonske zarjadniske jednanje w „njewšědnej měrje“ wumjetował.
Z přepytowanskim wuběrkom chce AfD nětko zamołwitosće wuslědźić dać. Socialne ministerstwo je hižo reagowało a spěchowansku směrnicu změniło. Nimo toho su přisłušneho statneho sekretara Sebastiana Vogela na wuměnk rozžohnowali. Po wustawje dyrbi krajny sejm přepytowanski wuběrk zasadźić, hdyž pjećina čłonow sejma to podpěruje. Frakcija AfD w krajnym sejmje hižo trěbnu ličbu hłosow docpěwa.
Waršawa (dpa/SN). W Pólskej zaběra politikarjow nadal wójna na Ukrainje. Zakitowanski minister Wladysław Kosiniak-Kamysz praji w interviewje z nowinu Super Express póndźelu, zo wón hrožacu wójnu z Ruskej njewuzamknje. Pólska měła so na tajku přihotować. Na prašenje, hač ma wón přěhraće Ukrainy a direktny nadpad Ruskeje na Pólsku na prawdźepodobny, wón praji: „Liču z kóždym scenarijom a bjeru najhórše najchutniše. Tole je nadawk zakitowanskeho ministra w situaciji, w kotrejž smy dźensa žiwi.“
Wuraznje podšmórny 42lětny, zo njeje tute słowa „jenož tak prajił“, ale zo bě je dokładnje wotwažował. Jeho ministerstwo je hižo prěnje kročele přihota šło. Tak na přikład pruwuja, kotre njedostatki we wuhotowanju hišće su. Při tym su wulke nakupy brónjow runje tak wažne kaž indiwiduelne wuhotowanje wojakow. Pólska hraje wažnu rólu při zakitowanju EU, tole wě tež Europska komisija, praji minister.
Hołbika su podhlada spionaže dla wosom měsacow dołho w Indiskej dźerželi. Nětko je wón zaso swobodny, rozprawjeja indiske medije. Policija je hołbika zašłu meju blisko finančneho centruma Mumbai popadnyła. Na křidłach bě policija pječa pismowe znamješka namakała a tute za chinske měła. Přepytowanja policije wudachu, zo njejedna so wo chinskeho ale taiwanskeho hołbja. Dokelž su hołbja zabyli, dyrbješe měsacy dołho w jatbje wostać.
Dźiwadźelnik Ryan Gosling, kotryž hraješe we woblubowanym filmje Barbie rólu Kena je so tež wot telewizijneho formata Bachelorette inspirěrować dał. Dokelž so w tutych formatach mužojo často na stereotypy a jednotliwe charakterne kajkosće redukuja, je sebi Gosling, kotryž tež hewak mnoho reality-tv hlada, tójšto wot nich wothladał.