Berlin (dpa/SN). Najebać rozdźělne měnjenja w koaliciji su so frakcije ample w zwjazkowym sejmje nimale jednohłósnje přećiwo tomu wuprajili, Ukrainje moderne křidłowe rakety typa Taurus přewostajić. Próstwu frakcije CDU/CSU, kotraž zwjazkowe knježerstwo wuraznje namołwja, wot Ruskeje nadpadnjenej Ukrainje rakety pósłać, kotrež sej swój zaměr sami pytaja, su wčera wječor z wjetšinu wotpokazali. Ukrainski prezident Wolodymyr Zelenskyj je wčera na swětowym hospodarskim zetkanju w Davosu hišće raz před tym warnował, zapadnu wojersku pomoc přetorhnyć.
Zapósłancy Zelenych a FDP kritizowachu, zo je próstwa CDU raketow dla z plenarnej debatu wo kóždolětnej rozprawje k połoženju zwjazkoweje wobory zwjazana. Taurus je moderna raketa zwjazkoweje wobory, kotraž móže objekty kaž bunkery z wulkeje wysokosće a zdalenosće trjechić. Zwjazkowy kancler Olaf Scholz (SPD) nochce rakety Ukrainje přewostajić, dokelž hrozy strach, zo bróń přećiwo objektam na teritoriju Ruskeje zasadźuja.
Podstupim (dpa/SN). Dźewjeć měsacow do wólbow krajneho sejma w Braniborskej leži SPD ministerskeho prezidenta Dietmara Woidkeho – kotraž knježi w tutym zwjazkowym kraju mjeztym dlěje hač 30 lět – ze 17 procentami jenož hišće na třećim městnje za AfD a CDU. Najsylniša móc w kraju by z 28 procentami AfD była, a to z jasnym předskokom, bychu-li přichodnu njedźelu wólby krajneho sejma byli. Tole je wuslědk woprašowanja instituta Insa w nadawku nowin Märkische Allgemeine Zeitung a Lausitzer Rundschau, kiž su wčera wozjewili. Wot lěta 2019 knježaca koalicija SPD, CDU a Zelenych njeby po tym žanu wjetšinu wjace měła.
CDU, kotraž knježi zhromadnje z SPD a Zelenymi, leži po woprašowanju z 18 procentami snadnje před socialnymi demokratami. Zeleni docpěwaja wosom procentow. Wot něhdyšeje politikarki Lěwicy Sahry Wagenknecht njedawno załožena strona BSW by hnydom 13 procentow dóstała a by w krajnym sejmje zastupjena była. Lěwica ma šěsć procentow. FDP dóstanje tři procenty a njeby znowa w sejmje prezentna była.
Dźěłanišćo za serbske kubłanske wuwiwanje (ABC) w Choćebuzu budźe wot lěta 2025 zaso na krajnej runinje Braniborskeje zaměstnjene a njepodsteji dlěje Choćebuskemu šulskemu zarjadej. To zhonichu wobdźěleni na posedźenju braniborskeje Rady za naležnosće Serbow wčera w Podstupimje.
Podstupim (SN/at). W Braniborskej ma 1. januara 2025 krajny institut za wu- a dalekubłanje wuwučowacych dźěłać započeć. Po tym, zo je kraj Berlin statne zrěčenje wo zhromadnym Krajnym instituće za šule a medije (LISUM) ze sydłom w Ludwigsfeldźe w juliju 2022 wupowědźił, hotuje so Braniborska na transformaciju dotalneho zarjadnišća z nowostrukturowanjom po swójskich ćežišćach. Steffen Kludt, za projekt zamołwity w braniborskim ministerstwje za kubłanje, młodźinu a sport (MBJS), je wotmyslenu strukturu noweho LISUMa wčera w Serbskej radźe předstajił.
Davos (dpa/SN). Ukrainski prezident Wolodymyr Zelenskyj je na swětowym hospodarskim forumje w Davosu před „zamjerznjenjom“ ruskeje wójny přećiwo swojemu krajej warnował. „Kóždy zamjerznjeny konflikt něhdy zaso wudyri“, rjekny Zelenskyj politikarjam a zastupnikam hospodarstwa. Wón so hižo dołho za to wupraja, wójnu na bitwišću rozsudźić a Ruskej strategisku poražku wobradźić. Zdobom prošeše Zelenskyj wo dalšu wojersku pomoc na dobro Ukrainy.
Přećiwo AfD demonstrowali
Köln (dpa/SN). W Kölnje su wčera wječor wjacore tysac ludźi přećiwo AfD demonstrowali. Wobdźělnicy mějachu chorhoje EU a tučelowe chorhoje sobu. Na plakatach demonstrantow steješe „Smy pisani. Smy wjace!“ abo „AfD – pućrubar fašizma“. Mnozy sej žadachu, zakaz AfD pruwować. Tež w Schwerinje dźěchu ludźo přećiwo AfD na dróhu. Tam bě jich jenož 1 600 wobdźělnikow. Nastork protesta bě tajne zetkanje prawicarjow w Podstupimje.
USA zastopnjuja Huthi
Doha/Gaza/Berlin (dpa/SN). Po wot Katara posrědkowanym dojednanju mjez Israelom a islamistiskej Hamas maja israelscy zastajency w Gazaskim pasmje medikamenty dóstać. Nimo toho chcedźa dalše pomocne srědki za nuzu ćerpjacu ciwilnu ludnosć do Gazaskeho pasma dowjezć. Transport je hižo po puću do Egyptowskeje. Wottam dowjezu pomocne srědki z nakładnymi awtami do Gazaskeho pasma. Zastarać chcedźa wosebje chronisce chorych zastajencow. Hamas so boji, zo móhł Israel mjez pomocnymi srědkami sćelaki schować, kotrež přeradźa, hdźe Hamas zastajencow chowa. Lěki maja tři měsacy dosahać.
Zwjazkowe knježerstwo po informacijach medijow pruwuje, Israel z dodawanjom granatow za tanki w boju přećiwo Hamas podpěrować. Wobdźělene ministerstwa su so pječa zasadnje na to dojednali, wotpowědnu próstwu Israela spjelnić. Dokelž njemóže industrija wulce preciznu municiju spěšnje dosć naprodukować, chcedźa granaty najprjedy raz ze składow zwjazkoweje wobory brać.