Wopory namocy wopominał
Mossul (B/SN). Bamž Franciskus bě na wopyće w Iraku tež w awtonomnej kónčinje Kurdistanje. W Mossulu, něhdyšim hłownym sydle teroristiskeje milicy Islamski stat, wopominaše wón wopory wójny a namocy. K woporam njeskutkow słušeja muslimojo, křesćenjo a jezidojo. Na kóncu modleše so bamž z přitomnymi wosebity wopomnjenski paćer. Chaldejsko-katolski arcybiskop Najib Mikhael Moussa je so swjatemu wótcej za wopyt wutrobnje dźakował. „Naš kraj trjeba profetiski hłós, zo by tu ćerpjacym ludźom pomhał“, wón podšmórny.
Móža synagogu twarić
Podstupim (B/SN). Jako poslednja němska krajna stolica dóstanje Podstupim zaso synagogu. Po lětadołhim tam-a-sem chcedźa ju lětsa nazymu twarić započeć, kaž to kultusowa ministerka Braniborskeje Manja Schüle (SPD) zhromadnje z prezidentom Centralneje rady židow w Němskej Josefom Schusterom připowědźi. Kraj natwari za 13,7 milionow eurow na Hrodowej synagogu a wosadny centrum. Fachowje přewodźa projekt Centralna městnosć dobroćelstwa židow w Němskej. Twarske dźěła maja po planje w lěće 2024 zakónčene być.
Katedrala znowa wotewrjena
Žadaja sej nowy lockdown
Berlin (dpa/SN). Hladajo na přiběrace ličby infekcijow z koronawirusom žadaja sej lěkarjo Němskeje na intensiwnych stacijach hnydomny lockdown. Z nowymi datami a rozšěrjenjom britiskeje warianty wirusa by radźomne było hnydom nowy lockdown wukazać, zo hodźało so wulkej třećej žołmje zadźěwać, rjekny nawoda interdisciplinarneho zjednoćenstwa za intensiwnu a nuzowu medicinu Christian Karagiannidis nowinarjam. Zwjazkowe knježerstwo měło připowědźenu hranicu incidency sto konsekwentnje přesadźić.
Tójšto zranjenych policistow
Drježdźany (dpa/SN). Při demonstracijach přećiwo politice knježerstwa přećiwo koronawirusej je so sobotu w Drježdźanach dwanaće policistow zraniło. Nimo toho registrowachu 47 chłostajomnych njeskutkow, mjez nimi nadpady na zastojnikow, ranjenja a spjećowanja. Najebać zakaz běchu so tysacy demonstrantow na wjacorych městnach zhromadźili. Policija někotrych z nich zaja.
Pytaja zhromadnu liniju
Najebać warnowanja před konsekwencami su wčera tysacy ludźi w ...
CDU do lěta wólbow špatnje startowała
Mainz/Stuttgart (dpa/SN). Po historiskej wólbnej poražce w Badensko-Württembergskej a Porynsko-Pfalcy pyta CDU za pućemi z krizy. Šěsć měsacow do wólbow zwjazkoweho sejma žada sej zwjazkowa ministerka za kubłanje Anja Karliczek (CDU) wjace zhromadnosće a jednoty w boju přećiwo koronapandemiji. „Wšitke rozsudy měli so po móžnosći w přezjednosći tworić. To je to, štož wobydlerjo w časach pandemije wot unije wočakuja“, rjekny wona powěsćerni dpa.
Bywšemu wobswětowemu ministrej CDU Norbertej Röttgenej je wólbny wuslědk jasny signal na adresu strony. „CDU dyrbi so tomu jako cyłk wobarać“, rjekny čłon prezidija strony nowinarjam. CDU dyrbjała spěšnje a spušćomnje dopokazać, „zo je šćěpjenje a testowanje dźěl jeje strategije w boju přećiwo pandemiji“. Městopředsyda frakcije CDU/CSU w zwjazkowym sejmje Carsten Linnemann rjekny: „CDU dyrbi skónčnje dopokazać, zo management přećiwo koronje wobknježi.“
Serbski wosadny zwjazk njeskorži
Budyšin (SN). Předsydstwo Serbskeho wosadneho zwjazka (SWZ) je na swojim schadźowanju minjeny štwórtk znowa wo aktualnej situaciji strukturneje změny w sakskej krajny cyrkwi dla wuradźowało. Jeho znapřećiwjenje přećiwo wutworjenju sotrowskeho cyrkwinskeho poměra wjacorych wosadow w regionje mjez Budyšinom a Biskopicami cyrkwinskeho wobwoda Budyšin-Kamjenc, mjez druhim Hodźijskeje a Hušćanskeje, bě krajnocyrkwinski zarjad w Drježdźanach wotpokazał. Nětko je so zwjazk prawnisce poradźować dał a zwěsćił, zo nima skóržba přećiwo wotpokazanju wuhlady na wuspěch. Tuž so tajkeho kroka wzda, kaž SWZ sobotu informowaše. Předsydstwo pak wita, zo staj so wyšej krajnocyrkwinskaj radaj Thilo Daniel a Klaus Schurig na wopyt a rozmołwu přizjewiłoj.
Serbskemu wosadnemu zwjazkej přisłušeja zastupjerjo a zastupjerki dwurěčnych wosadow Ewangelsko-lutherskeje krajneje cyrkwje Sakskeje. Swoju lětušu hłownu zhromadźizna chce SWZ 8. meje w Hodźiju přewjesć.
Žadyn wětřik wotzady
To a tamne (15.03.21)
Dawno znješkódnjena bomba je we Weissachu pola Stuttgarta zasadźenje policije zawiniła. W nadawku bydlenjotwarskeho předewzaća běchu wjacori sobudźěłaćerjo garažu wotewrěli. Tam namakachu pozdatnje strašny objekt. Policija da na to hłownu dróhu zawrěć. Fachowcy pak spěšnje zwěsćichu, zo bě bomba drje originalna, ale bjez rozbuchadła. Wona słušeše domizniskemu towarstwu, kotrež wužiwaše garažu jako skład.
Tři metry dołhi krokodil je wohnjowych wobornikow w Čěskej nastróžił. Wobornicy běchu woheń na třěše zahrodoweho domu w gmejnje Klopina 190 kilometrow wuchodnje Prahi hašeli. Na to chcychu w domje nutřka hladać, hač so tam něhdźe něšto dymi. To tam krokodil wokoło łažeše. Fachowc jeho popadny. Kak bě reptil do domu přišoł a hač tam legalnje přebywa, chcedźa nětko přepytować.
Z Bilzom rěčał
Drježdźany (SN/JaW). Połoženje Serbow w ewangelskim wosadnym zwjazku tworješe srjedźišćo wčerawšeje rozmołwy předsydy Domowiny Dawida Statnika z biskopom Ewangelsko-lutherskeje krajneje cyrkwje Sakskeje Tobiasom Bilzom w Drježdźanach.
W dwuhodźinskej rozmołwje rozprawješe předsyda Domowiny biskopej wo stawiznach a aktualnej situaciji serbskeho ludu. Mjez druhim Dawid Statnik wuzběhny, zo je „nimo swójby a kubłanišća cyrkej mnohim Serbam jenički rěčny rum“, rěka nowinskej zdźělence Domowiny. Nastupajo Hodźijsku wosadu poruči Statnik rozmołwu ze Serbskim wosadnym zwjazkom. Rozjimać měli předewšěm prašenje, kak Bože słowo w serbšćinje pod datymi wuměnjenjemi zaručić.
Wšitkich dorosćenych šćěpić
Washington (dpa/SN). Prezident USA Joe Biden chce šćěpjenski porjad w kraju zběhnyć a najpozdźišo wot 1. meje wšitkim dorosćenym w USA zmóžnić so pře koronawirus šćěpić dać. Zaměr je, dźeń njewotwisnosće 4. julija „normaliće zbližić“, kaž z Běłeho domu rěka. Knježerstwo chce zaručić, zo móža woprawdźe kóždeho dorosćeneho šćěpić. Tak chcedźa ličbu apotekow a strowotniskich centerow, w kotrychž šćěpja, jasnje rozšěrić.
Spahn: Serum wot apryla
Berlin (dpa/SN). Po přizwolenju noweho šćěpiwa předewzaća Johnson&Johnson njeliči zwjazkowy minister za strowotnistwo Jens Spahn (CDU) z tym, zo budźe serum hnydom k dispoziciji. Wón wočakuje najzašo srjedź abo kónc apryla prěnje posyłki, kaž sćelakej ARD rjekny. W tym zwisku chcył Spahn wědźeć, čehodla druhe kraje serum hižo dóstawaja a hdy budźe EU na rjedźe. Rozmołwy wo tym wjedźe Europska komisija. Serum pochadźa z USA, hdźež je faktisce zakazane šćěpiwo pře koronu wuwožować.
Šćěpjenje lěkarjam přewostajić
