Berlin (dpa/SN). Wjetšina wobydlerjow Němskeje do toho njewěri, zo zwjazkowe knježerstwo kaž přilubjene hač do 21. septembra kóždemu zajimcej šćěpjenje přećiwo koronawirusej poskići. Po woprašowanju slědźenskeho instituta YouGov w nadawku powěsćernje dpa jenož kóždy štwórty (26 procentow) wočakuje, zo knježerstwo tutón zaměr docpěje. 57 procentow ludźi to njewěri. 17 procentow nochcyše so k tomu wuprajić. Zwjazkowa kanclerka Angela Merkel (CDU) bě wospjet připowědźiła, zo chcyła hač do 21. septembra kóždemu dorosćenemu šćěpjenje přećiwo koronawirusej zmóžnić. Samo w rjadach CDU su wobmyslenja wulke. Jenož 47 procentow wolerjow CDU a CSU chutnje do toho wěri. W druhich stronach su dwěle wjetše.

Podstupim/Choćebuz (dpa/SN). Najebać sněh a hładkosć su dźensa rano w Braniborskej nastupajo powołanski wobchad přirunujo jenož mało njezbožow měli. Wot połnocy hač do 9 hodź. dóńdźe k 15 njezbožam z blachowej škodu a dalšim štyrjom zražkam ze zranjenymi.

Zymske wjedro je so wosebje w Delnjej Łužicy wo zapozdźene a wupadnjene ćahi postarało. Kaž Němska železnica rano informowaše, su předewšěm regiony wokoło Choćebuza a Kalawy (wokrjes Hornje Błóta-Łužica) potrjechene. W tamnych regionach Braniborskeje běchu jenož jednotliwe wupady abo zapozdźenja.

W Choćebuzu pak su w běhu dopoł­dnja tramwajki zastali jězdźić. Jako přičinu mjenowachu mylene wuhibki wějeńcow a zdźěla wupada miliny dla. Na wšitkich tramwajkowych linijach su nětko narunanski wobchad z busami zarjadowali. Wšitke rumowanske a na hladanje kolijow wusměrjene wozydła su zasadźene, zo bychu tramwajki prawje bórze zaso jězdźili, rěka z přisłušneho wobchadneho předewzaća.

Žadanja za wolóženjemi přiběraja – wirologojo raznje přećiwo tomu

Berlin/Braunschweig (dpa/SN). Imobi­lijowe hospodarstwo kritizuje w debaće wo móžne zběhnjenje wobmjezowanjow wšědneho žiwjenja koronawirusa dla politiske wusměrjenje na 50 přizjewjenych nowych infekcijow na 100 000 wobydlerjow. „Dyrbjało móžno być, zo tež při wyšich incidencach towaršnostne a hospodarske žiwjenje zamołwiće zaso norma­lizujemy“, rjekny prezident Centralneho imobilijowe wuběrka Andreas Mattner minjeny pjatk w Berlinje. Rozsudne dyrbjało być, zo njeje wjace hač 4 000 łožow intensiwnych stacijow wot koronapacientow wobsadźenych. Wid na Europu pokazuje, zo je dotal lědma jedyn z krajow hódnotu 50 nowych infekcijow na 100 000 wobydlerjow w běhu sydom dnjow docpěł. Z přiběracym šćěpjenjom ludźi měli so tež incidency hinak posudźować, Mattner potwjerdźi. „Kóždy měsac lockdowna płaći 34 miliardow eurow. Najebać wšitke hospodarske pomocy płaći: Wolóženja su najlěpša pomoc“, Mattner wuzběhny.

Na wšě 2 753,91 eurow maćerje přečinił je sydomlětny hólc w Hannoveru. Pachoł bě so na internetnej hrě wobdźělił a měješe dowolnosć maćerje, snadnu sumu zasadźić. Žona pak njebě sej wjace toho wědoma, zo su daty jeje kreditneje karty na platformje zapołožene. Syn hraješe tajnje dale, centrala za škit přetrjebarjow zdźěla. Wustróžana mać bě so na cen­tralu wobroćiła. Ta so z poskićowarjom hrow dojedna, zo njetrjeba mać na kóncu wjace hač sto eurow zapłaćić.

Samlutki je 70lětny muž z Jendźelskeje z čołmom Atlantik přeprěčił, cyłkownje 4 800 kilometrow. Srjedź decembra bě na Kanariskich kupach wotjěł a je wčera w Karibice dojěł. Ze swojej jězbu chcyše pjenjezy za organizaciju zběrać, kotraž so wo ludźi stara, kiž su na Alzheimer schorjeli. Frank Rothwell je tak najstarši muž, kotremuž je so tajke něšto poradźiło.