Kretschmer so starosći
Drježdźany (dpa/SN). Sakski ministerski prezident Michael Kretschmer (CDU) starosći so přiběraceje polarizacije towaršnosće koronapandemije dla. W běhu prěnjeje žołmy infekcijow bě respekt před njeznatej chorosću ludnosć hišće zwjazował, Kretschmer praji. Na to přiběraše lochkomyslnosć. Wěste kruhi wědomje wopačnosće šěrja, zo bychu towaršnosć pačili a destabilizowali. „Zo demonstranća eksistencu wirusa prěja, hladajo na połne chorownje lědma wutraješ.“
Lětsa žadyn rozrost wjace
Mnichow (dpa/SN). Tři hospodarske slědźenske instituty su swoju zhromadnu konjunkturnu prognozu za europasmo znižili. Institut Ifo w Mnichowje, KOF w Zürichu a Istat w Romje njeliča w nachilacym so štwórtym kwartalu wjace z rozrostom, ale z dale woteběracej produkciju wo 2,7 procentow. To by za cyłe lěto 2020 minus 7,3 proc. wučinjało, instituty dźensa zdźělichu. Za prěni kwartal 2021 liča z rozrostom 0,7 proc.
Znowa parlament wolić
Wjace hač tysac Lkw-jow čaka we Wulkej Britaniskej na awtodróze M20 ...
Wot njedźele šćěpja přećiwo koronje
Berlin/Mainz (dpa/SN). Němska hotuje so runja druhim krajam na zahajenje šćěpjenskeje akcije přećiwo koronawirusej. Po přizwolenju seruma přez Europsku uniju je Mainzska firma Biontech zhromadnje ze swojim ameriskim partnerom Pfizer hišće wčera wječor připowědźiła, lěk ze składow wzać a zamołwitym přewostajić. Njedźelu chcedźa šćěpić započeć. Strowotniski minister Jens Spahn (CDU) a šef Biontech Ugur Sahin staj sej zdobom wěstaj, zo srědk tež přećiwo mutaciji w Jendźelskej skutkuje.
Němska a wjetšina tamnych europskich krajow stej wčera zapućowanje ludźi z Wulkeje Britaniskeje přetorhnyłoj, zo bychu rozšěrjenju noweho wirusa zadźěwali. Dalše kraje chcychu dźensa slědować. Zwjazkowe knježerstwo je wčera wječor zapućowanje z Wulkeje Britaniskeje a Južneje Afriki dale wobmjezowało. Tak je wozydłowniskim předewzaćam w dalokej měrje zakazane wosoby wottam z lětadłom, železnicu, busom abo łódźu transportować. Wukaz płaći najprjedy raz hač do 6. januara.
Koch: Hody rozumnje swjećić
Cyrkwje z nowymi formatami korony dla – dorazny apel knježerstwa
Berlin (dpa/SN). Katolski Berlinski arcybiskop Heiner Koch namołwja, hladajo na koronapandemiju swójbne swjedźenje kaž tež Bože mšě k hodam rozumnje swjećić. Koronapandemije dla je nuznje trjeba kontakty redukować, rozłoži Heiner Koch jako předsyda komisije za mandźelstwo a swójby Němskeje biskopskeje konferency wčera w Berlinje. Zo njebudu tež wěriwi hody po zwučenym wašnju swjećić móc, je jemu jeno ćežko znjesliwe. Škit ludźi pak je wokomiknje wažniši, biskop rjekny.
To a tamne (22.12.20)
W milinowodźe wisajo wostał je jako rumpodich předrasćeny muž, kiž bě w Kaliforniskej z motorizowanym parašutom po puću. Pomocnicy móžachu jeho njedaloko Sacramenta njezranjeneho wuchować. Sanki pak njemóže wón nětko wjace wužiwać. Wohnjowi wobornicy jemu radźachu so tola zaso tradicionalnje na sanjach wot konjow ćahnyć dać.
Zwada, štó trjebany čajowy měšk zrumuje, je w durinskim Sömmerda k bijeńcy mjez mandźelskimaj wjedła. 52lětna žona ćisny čajowu kanu za mužom a kopny jemu do genitalijow, jako chcyše ju ze jstwy ćahnyć. Wona 77lětnemu wumjetowaše, zo bě ju do mjezwoča bił a zo chcyše ju po schodźe dele storčić. Policija wšak nětko přećiwo woběmaj zranjenja ćěła dla přepytuje.
Bože domy budu wotewrjene
Köln (B/SN). Někotre sakske wosady chcedźa swoje cyrkwje wopytowarjam lětsa přez hody wotewrjene wostajić. Cyrkwinski krajny zarjad podpěruje z tym akciju „Swěca wostanje zaswěćena – w Božej nocy“ z plakatami a dalšimi wabjenskimi akcijemi. Pozadk akcije je, zo ma so při wšěch wobmjezowanjach korony dla mnohim ludźom wopyt w cyrkwi zmóžnić. Wšako hrozy strach, zo njemóža so wšitcy wěriwi na planowanych krótkich Božich słužbach wobdźělić – pak strowoty pak njewěstosće dla. „Wěriwym je zwučeny puć do cyrkwje wažny, zo by jim hodowne poselstwo dóšło hač do wutroby. To ma tež lětsa tak być“, krajna cyrkej informuje.
Cyrkej měła zmužićiša być
Warnuje před swójbnej namocu
Berlin (dpa/SN). Zwjazkowa swójbna ministerka Franziska Giffey warnuje před swójbnej namocu k hodam. „Kóžde lěto namóc w swójbach k jutram a hodam přiběra. Lětsa je strach wosebje wulki“, rjekny politikarka SPD nowinarjam. „Čuwy su tak a tak hižo napjate, k tomu přińdu wobmjezowanja koronawirusa dla a starosće wo eksistencu.“ Giffey namołwja, nuzowy pomocny telefon swójbneho ministerstwa wužiwać.
One: Serum sprawnje rozdźělić
Berlin (dpa/SN). Organizacija za wuwićowu pomoc One farmowe předewzaća a staty namołwja, šćěpiwo přećiwo koronawirusej po wšěm swěće sprawnje rozdźělić. „Pandemija njeje skónčena, hdyž je serum k dispoziciji, ale hakle, hdyž maja wšitcy k njemu přistup“, rjekny Stephan Exo-Kreischer, direktor němskeje wotnožki organizacije. Předewzaća a politikarjo běchu stajnje twjerdźili, zo chcyli šćěpiwo wšěm spřistupnić. „Praktisce z toho ničo njewidźimy.“
Trump dale skorži
Firmowa centrala farmoweho předewzaća Biontech w Mainzu: W běhu ...
Diesel a bencin 2020 tunjej byłoj
Mnichow (dpa/SN). Ekstremnje tuni zemski wolij koronakrizy dla je so wo to postarał, zo běštej bencin a diesel prěnje jědnaće měsacow 2020 tak tunjej kaž dołho nic. Bencin płaćeše w tym času přerěznje 1,25 eurow na liter, piše awtomobilowy klub ADAC. Na tym drje so lětsa wjace wjele njezměni, měnja fachowcy kluba. Je to najniša płaćizna bencina, po tym zo běchu před dźesać lětami bencin E10 zawjedli. Tež diesel bě jara tuni. Cyłoněmski přerězk wučinješe wot januara hač do nowembra 1,11. To je najniša płaćizna wot lěta 2016. Mjeztym płaćizna zemskeho wolija zaso přiběra.
Z přijomnymi płaćiznami sprita pak je bórze nimo. Zniženje nadhódnotoweho dawka kónc lěta wuběži. Nimo toho dyrbja přetrjebarjo popłatk za wuhlikowy dioksid płaćić. Diesel a bencin budźetej tuž prawdźepodobnje wo dźesać abo jědnaće centow dróšej.
