Poradźowarnja pomha

Montag, 21. September 2015 geschrieben von:
Düsseldorf/Berlin (dpa/SN/K). Poradźowarnja předewzaćelow McKinsey budźe w krizy ćěkancow dla skutkownje pomhać. Tak zapřehnje so wona za zarjadowanje cyłoněmskeje struktury, z pomocu kotrejež maja so přichadźacy ludźo registrować a zastarać kaž tež azylowe procedury pospěšić. Na to staj so nowy šef zwjazkoweho zarjada za migraciju a ćěkancow Frank-Jürgen Weise a McKinsey dojednałoj. Na přichodnym zhromadnym migraciskim wjeršku štwórtk chce Zwjazk krajam dalšu financnu podpěru přilubić. Tole připowědźi zwjazkowy nutřkowny minister Thomas de Maizière (CDU). Dotal připrajene přidatne tři miliardy eurow maja kraje za přemało.

„Zemjerženje“ pola koncerna VW

Montag, 21. September 2015 geschrieben von:
Wolfsburg (dpa/SN). Hladajo na skandal manipulowanych přepytowanjow wotpłuna dla je awtotwarc Volkswagen předań dieselowych awtow w USA přetor­hnył. Rěčnik koncerna dźensa wotpowědne rozprawy medijow wobkrući. Potrjechene su aktualne modele VWja a Audija kaž tež trjebane awta. Kaž Volkswagen wčera přizna, je přepytowanje wotpłuna w USA z pomocu wosebiteje software manipulował, zo by tamniše krute předpisy spjelnił. Nětko móhło koncernej chłostanje hač do 18 miliardow eurow hrozyć. Na bursy je skandal dźensa prěnje sćěhi zawostajił. Primatna akcija koncerna zhubi nimale 20 procentow swojeje hódnoty. Analysća rěča zludani wo „zemjerženju“.

Nowe aktiwity Syriskeje dla

Montag, 21. September 2015 geschrieben von:
Berlin (dpa/SN). Němska a USA swoje diplomatistke prócowanja k rozrisanju krizy w Syriskej zesylnjeja. Tole zdźělištaj wonkowny minister USA John Kerry a jeho němski kolega Frank-Walter Steinmeier (SPD) wčera na zetkanju w Berlinje. Steinmeier rěčeše po pjećlětnej wójnje­ z wjele mortwymi a milionami ćěkancow wo „politiskej a moraliskej winowatosći, morjenje w Syriskej skónčić“. Najnowše rozmołwy mjez Moskwu a Washingtonom w tymle prašenju spožčeja nadźiju, wón doda. Kerry připowědźi, zo chcyli USA po mjezynarodnej kritice wo wjele­ wjace ćěkancow ze wšeho swěta přiwzać hač dotal připowědźene. Jeno ze Syriskeje přiwozmu 10 000 ludźi.

Wobrónjene němske lětadła na Baltikumje

Montag, 21. September 2015 geschrieben von:
Berlin (dpa/SN). Prěni króć po wudyrjenju krizy na wuchodźe Ukrainy su němske­ wojerske lětadła Eurofighter nad baltiskimi krajemi z połnym wójnskim wobrónjenjom po puću, zo bychu tamniši powětrowy rum stražowali. „Njeje to srědk eskalacije, ale skerje za to, so na samsnej runinje zetkać“, zdźěli inspektor Zwjazkoweje wobory za wojerske lětarstwo Karl Müllner powěsćerni dpa. Baltiske kraje čuja so wot Ruskeje wohrožene a su NATO prosyli, powětrowy rum stražować, zo bychu Rusku wottrašili. Dotal činjachu pak to njewobrónjeni. Zastupowaca předsydka Lěwicy Sahra Wagen- knecht brónjenje kritizuje. „Štóž wobrónjene lětadła do wuchodneje Europy sćele, je wočiwidnje rozum zhubił.“

Protest, ale tež witanje nazhonili

Montag, 21. September 2015 geschrieben von:

Biskopicy (SN/JK). Po dwěmaj njeměrnymaj nocomaj protestow wosta nóc na njedźelu za policiju a wosebje za ćěkancow w Biskopicach měrna. Tam je Swobodny stat Sakska w něhdyšej tworni městnosć za prěnje přijimanje ćěkancow zarjadował. To njeje so někotrym ludźom w měsće a wokolinje spodobało a su tuž přećiwo zaměstnjenju ćěkancow na zdźěla jara drastiske wašnje protestowali. Policija zadźěwa štwórtk wječor blokadź­e přijězda ćěkancow k objektej. Wjacorych protestowacych ludźi wona zaja, mjez nimi dweju, dokelž staj hitlerski postrow wužiwałoj. Zo by ćěkancow škitała, dósta policija wosebitu połnomóc, kotraž so jako skutkowna wopokaza. Před objektom nasta 100 metrow šěroki­ wěstotny wobłuk, w kotrymž maja zastojnicy prawo, kontrole přewjesć a městny zakaz wuprajić. Dołhož budźe trjeba, wostanu woni na městnje a objekt kaž tež ćěkancow škitaja.

To a tamne (21.09.15)

Montag, 21. September 2015 geschrieben von:

Runje dźesać mjeńšin na swobodźe dyrbješe 58lětny hižo zaso do jastwa. Muža běchu minjeny pjatk pušćili. W samsnym času dóńdźe do bliskeje policajskeje straže wukaz zajeća přećiwo njemu, podhlada jebanstwa dla, kaž policija zdźěli. Zastojnicy muža njedaloko jastwa lepichu a hnydom zaso sobu wzachu.

Tójšto zapozdźenja zawinowała je skupina howjadow minjeny pjatk, jako stejachu wone na centralnej čarje spěšnikow mjez Kasselom a Fuldu. Wotrězk, na kotrymž tež spěšniki mjez Berlinom a Frankfurtom a Hamburgom a Frankfurtom jězdźa, bě mjez 19.35 a 21.05 hodź. zawrjeny. Zhromadnje z wobsedźerjom poli­cisća kruwy popadnychu. Spěšniki wšak dyrbjachu w tym času po druhich čarach jězdźić, štož wjedźeše k zapozdźenjam hač do 45 mjeńšin. K zražkam z howja­dami pak na zbožo njedóńdźe.

Łužica (21.09.15)

Montag, 21. September 2015 geschrieben von:

Dźělne wotdołženje kiwa

Mittenwalde (dpa/SN/ch). Frakcija SPD w Braniborskim krajnym sejmje chce při planowanej wokrjesnej reformje dotalne bjezwokrjesne města Brandenburg nad Habolu, Choćebuz a Frankfurt nad Wódru wotćežić. Jako wyše centry měli so wone na hospodarske a kulturne srjedźišća regiona wuwić, zdźěli frakcija pjatk na zakónčenju swojeje dwudnjowskeje klawsury w Mittenwaldźe. Mjenowane města maja so předewšěm wo swoje nadawki jako komuny a wyše centry starać. Lěta dołho zadołženym městam ma so dźělne wotdołženje poskićić. Přewostajić ma so za to 400 milionow eurow, połojca z krajnych srědkow, połojca z financneho wurunanskeho zakonja. Reformowacy plan krajneho knježerstwa předwidźi dźesać město dotalnych 14 wokrjesow.

Miliony za pomnikoškit

Ze swjedźenskim zarjadowanjom na hródźe Wartburg pola Eisenacha su zawčerawšim pjećlětne dźěła na rewiziji Lutheroweje biblije oficialnje zakónčili. Rada Ewangelskeje cyrkwje w Němskej (EKD) bě wosebity wuběrk zasadźiła, w kotrymž je něhdźe 70 wědomostnikow, teologow a zastupnikow cyrkwje sobu skutkowało. Jeho předsyda Christoph Kähler je wuslědk předsydźe rady EKD Heinrichej Bedfordej-Strohmej (wotlěwa) přepodał. Předźěłana biblija ma 30. oktobra 2016 oficialnje wuńć. Wona je zdobom wažny projekt w přihotach 500. róčnicy reformacije w lěće 2017. Foto: EKD

Kriza ćěkancow dla bjez kónca

Freitag, 18. September 2015 geschrieben von:

Berlin/Ankara (dpa/SN/K). Byrnjež so groćane płoty po kilometrach a wysoke betonowe murje stajeli, ćěkancow to w jich nuzy njezatraša. Na němsko-awstriskej hranicy je policija wčera něhdźe 3 700 migrantow zadźeržała, tysac mjenje hač dźeń do toho, ale wjace hač wutoru. Do Awstriskeje je za dwaj dnjej nic mjenje hač 11 000 wućek před wójnu pytacych přišło, hłownje přez Chorwatsku a Słowjensku. Po tym zo je so zawrjenje hranicy ze Serbiskej jako poměrne skutkowne wopokazało, zawěsći Madźarska z groćanym płotom swoju hranicu nětko tež z Chorwatskej, zdźěli prawokonserwatiwny premier Viktor Orbán. Z twarom su hižo započeli.

Konferencu přihotowali

Freitag, 18. September 2015 geschrieben von:
Brüssel (dpa/SN). Wobswětowi ministrojo wšitkich čłonskich statow EU su so dźensa w Brüsselu zešli, zo bychu so na zhromadnu­ poziciju na klimowej konferency kónc lěta w Parisu dojednali. Na zetkanju statow G 7 srjedź lěta běchu wobzamknyli, zo hač do kónca lěttysaca škita klimy dla wolij, płun a wuhlo hižo njewužiwaja. Čłonske staty EU dyrbjeli tole přewzać, štož pak je dwělomne.

Anzeige