Ruscy wohnjowi wobornicy su dźensa rano na Moskowskim mjezynarodnym ...
Wita rozsud biskopow
Spahn za regionalne rjadowanje
Berlin/Mnichow (dpa/SN). Zwjazkowy minister za strowotnistwo Jens Spahn je so přećiwo zasadnej winowatosći wuprajił, na zjawnych městnach nahubnik wužiwać dyrbjeć. „Z mojeho wida je zmysłapołne, hdyž so tole lokalnje a regionalnje wotpowědnje ličbje infekcijow rjaduje“, rjekny politikar CDU wčera w sćelaku ARD. Wažne je, žórło wyšich ličbow infekcijow namakać. „Smy wšak wědźeli, zo móže z kóždym wolóženjom wobmjezowanjow koronawirusa dla zaso k wyšim ličbam infekcijow dóńć. Nětko dyrbimy hladać, hdźe so ludźo natyknu“, Spahn rjekny. Wón widźi najwjetši strach natyknjenja na swjedźenjach.
Hladajo na bližacy so zymny počas žadaja sej zastupnicy wjacorych němskich slědźenskich institucijow, w nutřkownych rumnosćach konsekwentnje nahubnik wužiwać. Jenož tak móhło so nowej žołmje infekcijow zadźěwać.
Lute rizikowe kónčiny
Spěšnotest za pasažěrow
Frankfurt n. M. (dpa/SN). Ze zawjazowacymi spěšnotestami na koronawirus bjezposrědnje do wotlěta chce koncern Lufthansa zaso interkontinentalne lěty zmóžnić. Najprjedy raz dźe wo pilotny projekt za někotre zwiski do USA, kotryž chcedźa hišće w oktobru zahajić, rěčnik Lufthansy zdźěli. Negatiwne testowe wuslědki maja pasažěrow wot tuchwilu płaćiwych mjezsobnych zakazow zapućowanja wuswobodźić. Za to trjebaja hišće dowolnosć wobeju knježerstwow.
Lětanska branša ma testy tež za alternatiwu za na přikład w Němskej planowane směrnicy karanteny při nawróće z rizikowych kónčin. Zamołwići z toho wuchadźeja, zo by tajki spěšnotest mjenje hač dźesać eurow płaćił, a w běhu 15 mjeńšin by wuslědk předležał. Lěkarski personal njeje za to trěbny. Tuchwilu běža rozmołwy z farmakoncernomaj. Hižo přichodne tydźenja chcedźa prěnje šarže skazać a pasažěram poskićić. Dotal njeje hišće jasne, štó měł kóšty spěšnotestow přewzać. Lufthansa nochce nimo toho swójski personal zasadźić, ale posłužby předewzaća Centogene wužiwać. W tym padźe bychu ludźo test zapłaćić dyrbjeli.
Matovič: Žana kwota migrantow
Bratislava (dpa/SN. Wot měrca w Słowakskej knježacy populistisko-konserwatiwny ministerski prezident Igor Matovič njeje so wčera jako jenički ze wšěch štyrjoch knježerstwowych šefow Visegrádskich krajow na zetkanju z prezidentku komisije EU Ursulu von der Leyen wobdźělił. Za to wón swojim wolerjam we wosobinskim poselstwje wobkrući, zo njehrozy Słowakskej žana zawjazowaca ličba migrantow, kotrychž měł kraj přiwzać. „Winowatostne kwoty na žadyn pad njebudu. To by tola kołwrótne było“, pisaše wón na Facebooku.
K druhim formam solidarity, kotrež wón njekonkretizowaše, je Słowakska přiwšěm zwólniwa, Matovič rozłoži. „Swojim europskim partneram sprawnje a rozsudźeni zdźělimy, zo zasadnje žanym winowatostnym kwotam njepřihłosujemy, zdobom pak wšitkim krajam pomoc poskićamy, kotrež pod ilegalnej migraciju najbóle ćerpja.“ Matovič wospjetowaše tak poziciju, kotrež bě tež socialdemokratiske knježerstwo do njeho zabrało. Von der Leyen so hižo dlěši čas podarmo prócuje, Čěsku, Słowaksku, Madźarsku a Pólsku pohnuć ćěkancow přiwzać.
To a tamne (25.09.20)
Konopej na třěše wosoboweho awta je w Bremerhavenje kedźbnosć policije zbudźił. Zastojnicy zadźeržachu 27lětneho a zakazachu jemu dale jěć. Šofer, kotryž njebě konopej scyła přiwjazał, njebě sej tež po doraznej rozmołwje žaneje winy wědomy. Nětko dóstanje chłostanku, dokelž njeje mebl porjadnje zawěsćił.
Wurumowanje garaže za čas lockdowna koronakrizy dla je so za muža w Jendźelskej wjace hač wudaniło. Mała pórclinowa kana, kotruž chcyše muž poprawom wobchodej za trjebane wěcy přewostajić, je na přesadźowanju 390 000 puntow wunjesła, nimale 426 000 eurow. Kana wopokaza so jako drohotne historiske sudobjo z Chiny z 18. lětstotka. Wot tuteje družiny eksistuje jenož hišće mało eksemplarow. Awkciski dom bě mjez 20 000 a 40 000 puntow wočakował. 51lětny předawar, kiž chce anonymny wostać, přeradźi, zo je jeho dźěd kanu z Chiny sobu přiwjezł, hdźež bě jako wojak we wójnje zasadźeny. Na to ležeše kana wjele lět w kisće w garaži.
Społnomócnjene su „hłós Serbow“
Choćebuz (SN/at). We wobłuku krajneje konferency je braniborski krajny zamołwity za naležnosće Serbow, statny sekretar Tobias Dünow, wčera w Choćebuzu ze štyrjomi hłownohamtskimi wokrjesnymi serbskimi społnomócnjenymi wuradźował. Přitomni su so prěni raz w tejle zestawje schadźowali, tak zo słužeše zetkanje tež wosobinskemu zeznaću. Statny sekretar Dünow mjenowaše społnomócnjene „centralny hłós Serbow. Wone so wo to staraja, zo wostawa serbska kultura žiwa, a su komunam narěčenske partnerki nastupajo praktiske prašenja mjeńšinoweho škita.“
Dorozumili su so přitomni wo nowelěrowanym serbskim postajenju zarunanja kóštow, kotrež w knježerstwowym hamtskim łopjenu přeco hišće wozjewjene njeje, a tohodla dotal njepłaći. Mjerzanja su dale z krajnym zawodom dróhownistwo. Tón je wobchadne tafle nastajić dał, kotrež dwurěčnosć nastupajo zakonskim rjadowanjam njewotpowěduja, němska a serbska rěč njejstej w samsnej wulkosći podatej. Runje tak rozjimachu njespokojacy staw dale dlijaceho so noweho serbskeho šulskeho postajenja.
App žana wulka pomoc
Berlin (dpa/SN). W boju přećiwo koronapandemiji w Němskej posudźuja zastupnicy lěkarjow skutkownosć noweje warnowanskeje app za mobilne telefony jako jara snadnu. „Dokelž daty tuteje app awtomatisce strowotniskim zarjadam njeposrědkuja, njeje nam tónle instrument w swojej tuchwilnej formje žana wulka pomoc“, rjekny předsydka Zwjazka lěkarjow zjawneje strowotniskeje słužby Ute Teichert nowinarjam. App njehraje „we wšědnym dźěle strowotniskich zarjadow tak derje kaž žanu rólu“.
Razniše naprawy korony dla
Mnichow (dpa/SN). W bayerskej stolicy Mnichowje płaća wot dźensnišeho razniše wobmjezowanja a winowatosć, w starym měsće škitny nahubnik wužiwać. Zakład toho je powšitkowny wukaz, kotryž su wčera wozjewili. Prawidła płaća hač do 1. oktobra. Tak smě so najwjace pjeć wosobow zetkać, wšojedne hač doma, w přirodźe abo w hosćencu. Wot 9 hač do 23 hodź. maja ludźo w dźělach nutřkowneho města sej hubu a nós zakryć. Kónc tydźenja je na někotrych městnach w nocy zakazane alkohol pić.
Rekordne ličby w Israelu
