Gebhardt žada sej kompromis
Drježdźany (SN). W zwadźe wo móžne přesydlenje Krajneho přepytowanskeho wustawa za strowotnistwo a weterinarstwo z Drježdźan do Biskopic je předsyda frakcije Lěwicy w Sakskim krajnym sejmje Rico Gebhardt ministerskeho prezidenta Michaela Kretschmera (CDU) namołwił, ze wšěmi potrjechenymi za kompromisom pytać. „Dotal njeje ministerski prezident přeswědčiwje rozkładł, čehodla a w čejim zajimje so za tutón přećah zasadźa. To je njefairne napřećo 260 přistajenym, kotřiž dyrbja potom wšědnje do Biskopic na dźěło jězdźić. Knježerstwo chce wočiwidnje nad hłowami sobudźěłaćerjow rozsudźić“, Gebhardt w nowinskej zdźělence piše.
Na njedawnej njezjawnej zawodnej zhromadźiznje běchu so přistajeni krajneho zarjada masiwnje přećiwo planowanemu přesydlenju wuprajili. Na wšě 80 procentow z nich přećah wotpokazuje. Jenož jara snadny dźěl by zwólniwy był w Biskopicach dźěłać. Zamołwići so nimo toho boja, zo by sej wulki dźěl fachowcow nowe dźěło w Drježdźanach pytał. Mjeztym so wo naležnosći tež w knježerstwje wadźa.
To a tamne (16.09.20)
Jónkrótnje 1 600 eurow za lěnjopasenje – na tutón poskitk Hamburgskeje Wysokeje šule za tworjace wuměłstwo su so ludźo ze wšeho swěta přizjewili, a to wjace hač 1 700. Doba přizjewjenja je so wčera skónčiła. Ze „stipendijom za ničočinjenje“ chcedźa ludźi pohnuć, zo w cyle nowych žiwjenskich kategorijach mysla. Ze wšěch próstwystajerjow ma jury nětko třoch za stipendij wuzwolić.
Pjany a jeno spódnju drastu woblečeny je šofer w Nürnbergu ćeknył, po tym zo bě wjacore wobchadne njezboža za sobu zawinował. 38lětny bě spočatnje čerwjenu amplu ignorował, při wotbočenju do druheho awta zrazył a skónčnje do wobchadneho znamjenja prasnył. Swědcy informowachu policiju, tež dokelž bě so muž po tym drastu slekł a pěši ćeknył. Test alkohola wunjese dwaj promilej.
Tež wo změny w cyrkwjomaj šło
Budyšin (SK/SN). Zwjazkowe zjednoćenstwo Lěwicy „Etniske mjeńšiny“ ma koaliciske zrěčenje CDU, SPD a Zelenych nastupajo serbske prašenja za dotal najlěpše w Sakskej. To zwěsćichu jeho čłonojo sobotu na wuradźowanju w Budyšinje. Zaběrali su so tež z prašenjom, što bu wuchadźejo z koaliciskeju zrěčenjow w Braniborskej a w Sakskej hladajo na serbski lud dotal docpěte a kak chce Lěwica k dalšemu zwoprawdźenju mjeńšinoweho prawa přinošować. Serbska Lěwica wita, zo tež serbske zjednoćenstwa w SPD a Zelenych wuslědki politiki Serbam napřećo hódnoća. Zdobom poskića woběmaj cyłkomaj zhromadne dźěło.
Wótrje kritizowali su sobotni wobdźělnicy saksku Lěwicu, zo njeje – njedźiwajo na dojednanje z lěta 2015 – žane naprawy dojednała, „mjeńšinowe prawo w trěbnej měrje“ w stronje zwoprawdźić. Jednohłósnje schwalichu protestny list zwjazkowej změrcowskej komisiji. Přitomni zhonichu tež wo strukturnych změnach katolskeje a ewangelskeje cyrkwje w serbskich kónčinach. Žanažkuli změna njesměła na kóšty serbskich wosadow hić, zwuraznichu woni w swojim stejišću.
Róčnicu załoženja swjećili
Berlin (dpa/SN). Ze swjedźenskim zarjadowanjom je Centralna rada Židow dźensa w Berlinje 70. róčnicu swojeho załoženja woswjećiła. W swjedźenskim přednošku w Centrumje Judaicum pokaza zwjazkowa kanclerka Angela Merkel (CDU) na wulke zasłužby centralneje rady, kotraž bě so jenož pjeć lět po holocausće na to zwažiła židowske žiwjenje w Němskej, w „kraju skućićelow“, znowa zmóžnić. Centralna rada zastupuje zajimy 23 krajnych zwjazkow a 105 židowskich wosadow z něhdźe 100 000 čłonami.
Dwělomny zakoń schwaleny
London (dpa/SN). Najebać wšitke warnowanja je delnja komora britiskeho parlamenta wčera wjele diskutowany zakoń premierministra Borisa Johnsona wo brexiće schwaliła. Premierminister chce ze zakonjom wo nutřkoeuropskich wikach loni z Europskej uniju wujednany zakoń wo wustupje Wulkeje Britaniskeje z EU we wažnych dypkach jednostronsce změnić. W Brüsselu maja iniciatiwu Johnsona za ranjenje zakonja.
Čakaja na wuslědki testow
Něhdźe sto ludźi je wčera wječor na Budyskich Žitnych wikach ...
Nowe lěhwo za migrantow dotwarjene
Athen (dpa/SN). Grjekski minister za migraciju Notis Mitarakis wšitkich bjezdomnych migrantow na kupje Lesbos namołwja ručež móžno do noweho, prowizoriskeho stanoweho lěhwa zaćahnyć. To je po słowach Mitarakisa jich winowatosć. „Wot přichodneje póndźele wobdźěłaja sobudźěłaćerjo jenož hišće azylowe próstwy za tych, kotřiž su w lěhwje“, rjekny minister wčera rozhłosowemu sćelakej Parapolitika.
Wospjet warnowaše Mitarakis migrantow, wotdźeržowacych druhich wot toho, do noweho prowizoriskeho lěhwa hić, kotrež běchu zamołwići zhromadnje z pomocnymi organizacijemi natwarili. „Wěmy dokładnje, wo koho so jedna“, rjekny wón hladajo na mału skupinu migrantow, kotrychž jako škarakow znaja. Tući běchu minjeny tydźeń woheń zamiškrili, kotryž je lěhwo zničił. Grjekska njeda so wudrěwać, wón doda.
Trump: Bórze budźe chłódnišo
Sacramento (dpa/SN). Prezident USA Donald Trump je na wopyće w Kaliforniskej tamnišich lěsnych wohenjow dla wuznam klimoweje změny złahodnił. Kaliforniski minister Wade Crowfoot sej w diskusiji z Trumpom žadaše, zo měli změnu klimy a jeje wuznam za lěsy připóznawać a bóle z wědomostnikami dźěłać. „Bórze budźe chłódnišo, přihladujće prosće“, Trump rjekny. Minister Crowfoot, do kotrehož zamołwitosće tež słuša přirodne žiwjenske zakłady zachować, jemu znapřećiwi: „Bych sej přał, zo wědomosć Wam přihłosuje.“ Prezident Donald Trump rjekny: „Njewěrju, zo wědomosć to woprawdźe wě.“
Prezident je sej wěsty, zo je špatny lěsny management za zahubne wohenje zamołwity. Kaliforniski guwerner Gavin Newsom Trumpej znapřećiwi, zo steji najwjetši dźěl lěsow pod zarjadnistwom Zwjazka. Kaliforniska sama wobsedźi runje tři procenty lěsa. Kandidat demokratow za prezidenta Joe Biden mjenowaše Donalda Trumpa hladajo na toho wuprajenja „klimopolitiskeho zapalerja“.
To a tamne (15.09.20)
Najmjeńšej gmejnje Němskeje ležitej w Schleswigsko-Holsteinskej a w Porynsko-Pfalcy. W Gröde, na kumštnej kupje w Sewjernym morju, kaž tež w Dierfeldźe we wulkanowej Eifeli bydleše kónc 2019 stajnje dźesać ludźi. Lěto do toho bě Gröde po wšej Němskej najmjeńša gmejna z runje hišće sydom wobydlerjemi. Najwjace ludźi bydleše kónc 2019 znowa w Berlinje (3,67 milionow). Najhusćišo wobsydleny je Mnichow, hdźež bydli 4 777 ludźi na kwadratny kilometer. W Parisu je jich štyri króć telko: 21 000.
Pilnje harowacy jěž je w Magdeburgu zasadźenje policije zawinił. W rańšich hodźinach bě muž na to tukał, zo su paduši w domje susoda, dokelž słyšeše podhladne zwuki, jako by něchtó z piłu rězał. Policisća ležownosć kontrolowachu a namakachu jěža, kiž metalowy předmjet před sobu storkaše, štož zwuki zawinowaše.
Lukašenko cyrkwi hrozył
Minsk (B/SN). Běłoruski prezident Aleksander Lukašenko je podpěru cyrkwje demokratiskemu hibanju w swojim kraju wospjet raznje kritizował a jej ze sankcijemi hrozył. „Stat njebudźe tomu přihladować“, rjekny Lukašenko. Wosebje katolska cyrkej bě so na stronu wobydlerjow Běłoruskeje stupiła, kiž demonstrowachu přećiwo sfalšowanju prezidentskich wólbow na dobro Lukašenka. Arcybiskop Minska Tadeusz Kondrusiewicz kritizowaše brutalne wobchadźenje wěstotnych mocow z demonstrantami.
Chcedźa z Romom rěčeć
Bonn (B/SN). Němska biskopska konferenca chce dwělomne instrukcije přichod katolskich wosadow nastupajo z Vatikanom rozjimać. Předsyda konferency biskop Georg Bätzing chce přiwzać poskitk rozmołwy z klerusowej kongregaciju. Wón chce namjetować rozmołwu z biskopami a lajkami wobstejaceho prezidija synodalneho puća, dokelž su biskopja, měšnicy a lajkojo w instrukciji na samsnej runinje narěčami. Papjera z Vatikana mjez druhim wotpokazuje, zo lajkojo wosady nawjeduja.
Klóšter dóstanje přirost
Lukašenko zetka so z Putinom
Minsk/Soči (dpa/SN). Pod ćišćom masowych protestow w swojim kraju poda so běłoruski prezident Aleksander Lukašenko dźensa na krizowu rozmołwu z ruskim prezidentom Wladimirom Putinom do čornomórskeje metropole Sočija. Je to prěnje wosobinske zetkanje wobeju politikarjow po prezidentskich wólbach 9. awgusta w Běłoruskej – a prěni króć po wólbach, zo Lukašenko kraj wopušći. Ruska je wuski zwjazkar Běłoruskeje.
EU wuradźuje z Chinu
Brüssel/Peking (dpa/SN). Zwjazkowa kanclerka Angela Merkel (CDU) je dźensa zhromadnje z druhimi wodźacymi politikarjemi Europskeje unije na widejokonferency z chinskim prezidentom Xi Jinpingom wo spěšnym wotzamknjenju inwesticiskeho plana wuradźowała. Zaměr je, jednanja hač do kónca lěta zakónčić. Z wida EU dyrbjała China za to wšelake wuměnjenja spjelnić a na přikład europskim předewzaćam lěpši přistup k chinskim wikam zmóžnić.
Nowy rekord infekcijow
