Pěstowarnje zaso wotewrěć?
Berlin/Drježdźany (dpa/SN). Pěstowarnje w Němskej maja so „łahodnje“ zaso wotewrěć. Na to su so swójbni ministrojo Zwjazka a krajow dojednali. Stać ma so to po štyrjoch schodźenkach, kaž zwjazkowa swójbna ministerka Franziska Giffey (SPD) zdźěli. Konkretny datum móžneho wotewrjenja dźěćacych přebywanišćow wona njezdźěli.
Štyri schodźenki wopřijimaja aktualne nuzowe hladanje, rozšěrjene nuzowe zastaranje, wobmjezowany normalny wšědny dźeń a nawrót k normalnemu dźěłu. Rozsudźić maja zwjazkowe kraje.
Sakski kultusowy minister Christian Piwarz (CDU) njemóže sej předstajić, zo su pěstowarnje bórze zaso přistupne. Wón drje móže staršich rozumić, kotřiž doma dźěći zastaruja. Na tamnym boku je runje w pěstowarnjach ćežko trěbne wostawki dodźeržeć.
Dale žane jězby
Berlin (dpa/SN). Zwjazkowe knježerstwo je swoje aktualne warnowanje před jězbami do wukraja podlěšiło, powěsćernja dpa rozprawja. Nowinarjo běchu do hižo dźensnišeho posedźenja kabineta dokument dóstali, w kotrymž steji, zo tuchwilne warnowanje dale płaći, „znajmjeńša hač 14. junija“.
Wobzamknjenje je wonkowne ministerstwo pječa z tamnymi ministerstwami wothłosowało. K wopodstatnjenju rěka, zo njebudu přichodne tydźenje žane jězby do wukraja móžne. Dyrbimy dale z drastiskimi wobmjezowanjemi w mjezynarodnym lětarstwje, ze zawrjenymi mjezami a z drastiskimi karantenowymi rjadowanjemi po wšěm swěće ličić.
Korona: Bóle katastrofa hač kriza
Berlin (dpa/SN). Tuchwilna koronapandemija je po přeswědčenju Berlinskeho socialneho wědomostnika prof. Martina Vossa katastrofa. Zo so wo krizy rěči, wón kritisce wobhladuje. „W koronapandemiji pobrachuja wobrazy zničenja, hnydom widźomne wulke ličby woporow, zranjeni ludźo a zničene domy“, rjekny Voss, kiž nawjeduje katastrofowe slědźenišćo Swobodneje uniwersity Berlin, powěsćerni dpa. Tuž so mnohim zdawa, zo wšitko scyła tak zlě njeje.
„We hłowje mamy wobrazy katastrofow po wichorach abo zapławjenjach“, praji wědomostnik. Pandemija pak budźe sej wo wjele wjace woporow žadać hač tsunami lěta 2004 abo zemjerženje na Haitiju 2010. Martin Voss mjenuje koronapandemiju „kompleksnu katastrofu“, dokelž su praktisce wšitke wobłuki potrjechene a sćěhi njewotwidźomne.
Hač je politika prawje na wohroženja pandemije dla reagowała, so hakle dołhodobnje pokaza. „Operujemy na wočinjenej wutrobje towaršnosće, štož pak njejsmy do toho scyła zwučowali.“
To a tamne (29.04.20)
Na zadnim sydle awta hólčka porodźiła je žona w Stuttgarće. Nan dźěsća bě ju wčera rano do chorownje wjezł, jako so hrona započachu. Wustróžany zrazy muž na to do před nim jěduceho awta, dokelž bě přepozdźe borzdźił. Nichtó so na zbožo njezrani. Jako pomocnicy přijědźechu, bě žona hižo porodźiła. Chorobne awto dowjeze ju a synka do chorownje.
Z něhdyšich słužbnych košlow cłownikow nastawaja w Berlinje škitne zakryća za wšědny dźeń. Škity zhotowjeja we wobłuku recyclingoweho projekta ze składowanych zelenych košlow, kaž zastupnicy cła zdźěleja. Z jedneje tajkeje šija štyri škity. Trěbny gumij maja ze starych kabatow cłownikow. Košle předźěłuja w Berlinskich dźěłarnjach zbrašenych. Tam nastawaja z košlow tež toboły a nachribjetniki. Wšitke dochody su na dobro dźěłarnjow zbrašenych.
Hdyž maš zaćišć, zo strona za cyłe hibanje rěči
Budyšin/Drježdźany (SN/at). Sakscy swobodni wolerjo (SW) žadaja sej w lisće ministerskemu prezidentej Michaelej Kretschmerej (CDU) nastupajo wobchad z koronapandemiju „hnydomny kónc wobmjezowanjow w Sakskej, hnydomne wotewrjenje wšitkich šulow a dźěćacych zarjadnišćow, kupjelow, wobchodow kaž tež gastronomiskich zarjadnišćow a hnydomnu normalizaciju žiwjenja“. W spisu tež čitaš: „W Sakskej je žołma korony přewinjena.“ Reakcije na list, kotryž je krajny předsyda SW Steffen Große sobu podpisał, su rozdźělne. Što měnja radźićeljo frakcije SW w Budyskim wokrjesnym sejmiku k tomu?
Trump chce Chinu chłostać
Washington (dpa/SN). Prezident USA Donald Trump hlada jara optimistisce na hospodarske wuwiće kraja w druhim połlěće. Třeći, wosebje pak štwórty kwartal budźe nastupajo hospodarski wukon „spektakularny“, rjekny prezident wčera na nowinarskej konferency na zahrodźe Běłeho domu we Washingtonje. Hospodarstwo USA je koronakrizy dla tuchwilu w ćežkej krizy. Fachowcy wšak liča z dalšim pohubjeńšenjom. Trump zdobom připowědźi, zo wo tym rozmysluja Chinu chłostać, dokelž je na krizy wina.
Awstriske hotele zaso wotewru
Wien (dpa/SN). Hotele a pensije w Awstriskej smědźa wot 29. meje zaso hosći witać. To je ministerka za turizm Elisabeth Köstinger (ÖVP) dźensa we Wienje připowědźiła, pokazujo zdobom na wuspěchi při wobmjezowanju koronapandemije. Minjene tydźenje běchu za branšu ekstremnje ćežke a eksistencu wohrožace, wona přizna. Aktualne wuwiće pak dowola nowozapočatk. Hižo 15. meje smědźa hosćency w Awstriskej pod škitnymi naprawami zaso wotewrěć.
Fonds za hosćencarjow
FDP za „komisiju swobody“
Kwota přiběra
Berlin (dpa/SN). Kwota natyknjenjow z koronawirusom w Němskej po informacijach Roberta Kochoweho instituta (RKI) zaso přiběra. Po wčera wječor wozjewjenej statistice instituta kóždy z wirusom natyknjeny dalšeho čłowjeka natyknje. Tak mjenowana reprodukciska kwota tuž znowa 1,0 wučinja. To rěka, zo ličba nowych schorjenjow wjace njewoteběra kaž w minjenych dnjach.
RKI bě stajnje zaso potwjerdźał, zo dyrbjała kwota dołhodobnje niša hač 1,0 być. Hakle potom móhli z toho wuchadźeć, zo epidemija woteběra. Po trochowanju instituta je w zwjazkowej republice něhdźe 114 000 ludźi infekciju z wirusom přetrało. Kaž w druhich krajach liča fachowcy tež w Němskej z wulkej ličbu padow korony, kotrež njejsu spóznali.
Chłostanja nětko razniše
Berlin (dpa/SN). W nadróžnym wobchadźe płaća wot dźensnišeho někotre nowe prawidła a nowy katalog chłostanjow. Tak chcedźa kolesowarjow a pěškow lěpje škitać a na tamnym boku smalerjow raznišo chłostać.
Hdyž kolesowarjow, pěškow a elektriske rolery přesćahnu, dyrbja šoferojo awtow wotnětka w sydlišćach wotstawk połdra metra dodźeržeć, zwonka nich samo dweju metrow. Dotal bě jeničce „dosahacy wotstawk“ předpisany.
Na kedźbu brać dyrbja so tež wšitcy, kotřiž rady spěšnišo jězdźa hač dowolene. Nětko dosaha hižo 21 km/h wjace hač dowolene we wsy/měsće, zo dóstanješ 80 eurow pokuty a dypk w Flensburgu a zo dyrbiš jězbnu dowolnosć na měsac wotedać (dotal 31 km/h). Zwonka sydlišćow je nowa hranica 26 km/h.
Hinak hač dotal móža jězbnu dowolnosć hižo při prěnim překročenju sćazać. Štóž spěšnosć wo 20 km/h překroči, wšojedne hač w sydlišćach abo zwonka nich, dyrbi wotnětka dwójce tak wysoku pokutu płaćić kaž dotal. Raznišo chłostać chcedźa mjez druhim tež parkowanje na kolesowanskich šćežkach.
