Tróšku normality
To a tamne (16.04.20)
Wopity muž w zaječim kostimje je w sewjerorynsko-westfalskim měsće Unna z priwatnym jutrownym wohenjom hnydom dwójce zasadźenje policije zawinował. Jako zastojnicy při wrotach kłapachu, jim 64lětny w zaječim kostimje a z košom w ruce wočini, w kotrymž bě bleša palenca. Muž dyrbješe sylneho kura dla woheń hašeć. Tři hodźiny pozdźišo so woheń znowa paleše, bleša palenca bě wupita. Nětko dyrbi wón pokutu płaćić.
Jězdźo ze swojim rolatorom po zahrodźe je 99lětny Brita Tom Moore na internetnej stronje dźesać milionow eurow zezběrał. Pjenjezy chce wón statnemu strowotniskemu systemej NHS přewostajić. Moore bě připowědźił, zo chcył hač k stoćinam zahrodu njedaloko Cambridge sto króć wobkružić. Wuraznje dźakowaše so wón lěkarjam a hladarjam, kotřiž „sej tute pjenjezy zasłuža“.
Ličby korony dale přiběrace
Berlin (SN). W Němskej je so hač do wčera wječora 128 400 ludźi z koronawirusom natyknyło, to je nimale 2 000 wjace hač dźeń do toho. Kaž powěsćernja dpa rozprawja, je dotal znajmjeńša 3 217 ludźi na sćěhi wirusa zemrěło. Po trochowanju Instituta Roberta Kocha je 68 200 ludźi chorosć přetrało. W USA je w běhu 24 hodźin na wšě 2 228 pacientow na koronawirus zemrěło. Kaž Sakska zdźěli, bě tam wčera dotal 74 wosobow na wirus zemrěło, 3 915 je natyknjenych.
Wočakuja ćežku krizu
Washington (dpa/SN). Koronawirusoweje pandemije dla dyrbi hospodarstwo z dramatiskimi stratami ličić. Mjezynarodny měnowy fonds IWF wočakuje najraznišu globalnu hospodarsku krizu minjenych nimale sto lět. Globalny hospodarski wukon po jeho wobličenjach lětsa wo tři procenty woteběra, w europasmje samo wo 7,5 procentow, IWF w swojim najnowšim posudku twjerdźi. Ličba bjezdźěłnych w tym zwisku drje raznje přiběra. W januaru bě IWF hišće hospodarski rozmach třoch procentow wěsćił.
Afriskim krajam pomhać
W ruskej stolicy Moskwje trjebaja ludźo po wukazu města wot ...
Guterres kritizuje rozsud Trumpa
Wotewru šule a pěstowarnje
Sakska dźensa korony dla rozsudźi
Drježdźany/Berlin (dpa/SN). Sakske krajne knježerstwo chce dźensa rozsudźić, kajke wobmjezowanja wšědneho žiwjenja koronawirusa dla móhli so zaso zběhnyć. Do toho chcyše zwjazkowa kanclerka Angela Merkel (CDU) na telefoniskej konferency z ministerskimi prezidentami zwjazkowych krajow wo tym wuradźować. W běhu wječora chcychu zjawnosć wo wuslědkach informować. Powšitkownje z toho wuchadźeja, zo budu naprawy skerje kedźbliwe, na přikład z wotewrjenjom twarskich wikow.
Sakska ministerka za strowotnistwo Petra Köpping (SPD) bě so wčera za to wuprajiła, po 20. aprylu wšelake wobmjezowanja zaso zběhnyć. „Smy za wolóženja w tych wobłukach, kotrež su towaršnostnje a hospodarsce najwažniše“, rjekny wona nowinarjam. Na žadyn pad njesměła Sakska do fazy wróćo padnyć, w kotrejž „nam ličby infekcijow ćěkaja“. Bayerski ministerski prezident Markus Söder (CSU) porno tomu zběhnjenje wobmjezowanjow po jutrownych prózdninach jako „přezahe“ wotpokazuje.
To a tamne (15.04.20)
Alkohol njepomha přećiwo koronawirusej! Tole zdźěla swětowa strowotniska organizacija WHO, wobroćejo so zdobom přećiwo daloko rozšěrjenemu předsudkej, zo wysokoprocentowski alkohol wirus niči: „To wón nječini“, zdźěla regionalny běrow WHO w Kopenhagenje. Nawopak alkohol strowoće ludźi zeškodźi a tak riziko zwyši, na wirus schorjeć. Alkohol žada sej kóžde lěto po wšěm swěće tři miliony smjertnych woporow.
Mzdu sej sama skrótšiła je ministerska prezidentka Neuseelandskeje Jacinda Ardern koronakrizy dla. Wona wzdawa so přichodne šěsć měsacow 20 procentow swojich dochodow. To samsne płaći za čłonow knježerstwa a dalšich wysokich zastojnikow, wona na nowinarskej konferency we Wellingtonje zdźěli. Rjadowanje njepłaći za strowotniski personal a policistow, kiž přećiwo wirusej wojuja.
Recepty za nuzowy pad
Berlin (B/SN). Zwjazkowy zarjad za škit wobydlerstwa a katastrofowu pomoc je hromadźe z Bonnskimi pomocnymi organizacijemi wubědźowanje wo najlěpšu „kucharsku knihu za nuzowe pady“ wupisał. Hač do 15. meje móža ludźo recepty zapodać, za kotrež njetrjebaš ani milinu ani wodu z honača. Akcija ma pokazać na wužitk zastaranja w nuzy „za wšě pady“. Dobra rada njeměri so tu jenož na rezerwu žiwidłow, ale ma zdobom praktisku pomoc skićić, pisa ewangelski tydźenik Der Sonntag. Nimo 50 najlěpšich receptow měła kucharska kniha tež na to skedźbnjeć, kak dołho so jědź dźerži a kak móžeš sam žiwidła plahować.
Złóstnistwa chłostać
Dojednanje w Israelu móžne
Jerusalem (dpa/SN). Jednanja k wutworjenju knježerstwa w Israelu su w nocy na dźensa derje postupowali. Kandidat opozicije Benny Gantz je so znowa wosobinsce ze šefom přechodneho knježerstwa Benjaminom Netanjahuwom zetkał. Wo jednotliwych dypkach zeńdźenja njeje ničo znate. Wobaj pak staj signalizowałoj, zo je dojednanje móžne. Hišće hač do srjedy 24 hodźin mataj chwile knježerstwo wutworić.
Chinske eksporty dale niske
Peking (dpa/SN). W zwisku z koronawirusom su so chinske eksporty přirunajo z lońšim lětom znowa pomjeńšili. Wone pak njejsu z minusom 6,6 procentow hižo tak niske kaž w januaru a februaru, hdźež registrowachu statistikarjo 17,2 procentnej dypkaj mjenje. Dokelž so koronawirus po cyłym swěće wupřestrěwa, to wězo wikowanje poćežuje. Mjeztym zo w Chinje produkcija zaběži, fabriki w mnohich krajach po cyłym swěće njedźěłaja.
Płaćizny so trochu zwyšili
