1We wólbnym wokrjesu 57, za kotryž kandiduju, su w Slepjanskej wosadźe serbska rěč, serbske nałožki a serbska kultura žiwe. Dwurěčne popisanja su spóznajomne na přikład na wjesnych taflach a pućnikach. Tradicije hajić a z nimi domiznu zachować mam za spomóžne. Lětnje dóstawaja Serbja financnu podpěru ze stron Sakskeje, tež wokrjes Zhorjelc so za narodnu mjeńšinu Serbow zasadźa.

2Akceptabelne namjety komisije za rozrost, strukturnu změnu a dźěło spočatk lěta su wuměnjenje za dalše napra­wy Zwjazka w našim swobodnym staće­. Po mojim zdaću so tuchwilu na­ležnosće na zwjazkowej runinje trochu dlija. Ludźo w našim regionje trjebaja nuznje trěbne strukturne wuwića kaž spěšniše planowanje, wutwar infra­struktury, zasydlenje předewzaćow, podpěru wobstejacym zawodam, zasydlenje zwjaz­kowych zarjadnišćow a slědźerskich institutow.

1Haj, Sakska měła serbsku rěč sylnišo spěchować! Hinašu abo dalšu rěč nawu­knyć rěka stajnje tež hinaši abo dalši­ wid na swět sej zdobyć – to mam za wulke wobohaćenje. Jara so mi lubi, zo su online-poskitki, rěč nawuknyć. Pomocne by zawěsće było, namakać partnerow za zwučowanje rěčenja. Dobry krok do tohole směra by serbska rěčna šula jako swójska institucija była.

2Sprawnje prajene so starosću, kak a za čo budźemy pjenjezy wudawać. Mamy drje hižo proces zakładneho wu­smě­rjenja regiona, ale najwjetši dźěl pje­njez­ zda so hižo zaplanowany być. To nimam­ ani za demokratiski ani za transparentny proces – a tajki na kóždy pad trjebamy, zo bychmy wěrjomnu a naslědnu strukturnu změnu zmištrowali. Serbja jako wot brunicy potrjecheny lud trjebaja tule institucionalizowany hłós w kraje přesahowacym procesu.

1Serbska identita dyrbi runohódny dźěl žiwjenja w Sakskej być. Wšitcy wobdźěleni su wužadani Druhi plan napra­wow za serbsku rěč zwoprawdźić. Załožić w Budyšinje serbsku rěčnu šulu je při tym jenož jedyn z našich zaměrow. Serbja wobohaćeja towaršnostne žiwjenje w Němskej. Hišće lěpje dyrbi so nam poradźić, zo stej serbska rěč a kultura widźom­nišej.

2Je wažne, zo su zajimy serbskeho ludu­ wobstatk zakónčaceje rozprawy komisije za rozrost, strukturnu změnu a dźěło a zo su tež w planach naprawow wobkedźbowane. Kónc wudobywanja a zmilinjenja brunicy hač do lěta 2038 a ze stron Zwjazka přilubjene financne pomocy skića nětko wulku šansu­, re­gion a z nim zdobom hódnotu domizny Serbow pozběhnyć a zesylnić. Za to wosobinsce wojuju.

1Mnozy ludźo w regionje drje serbske nałožki kaž ptači kwas swjeća, njewědźa pak, zo jedna so při tym po pochadźe wo serbski nałožk. Dyrbjeli spytać w šulach zaso wjac wažnosće na regionalnosć kłasć, zo njeby so naša kultura w njewědźe zhubiła.

2 + 3Njerozumju kónc wužiwanja jeničkeho energijo­we­ho nošerja, kotryž mamy w Němskej we wulk­ej měrje k dispoziciji. Strukturna změna so nam jenož poradźi, hdyž planowanja pospěšimy a tež raz tro­chu wokoło róžka myslimy. Awtodróhi a elektrifikowane železniske zwiski žane dźěłowe městna a žane tworjenje hód­notow do regiona njepřinjesu. Prašam so tuž, kak by hladajo na demografisku změnu z kompetencnym centrumom za hla­danje było? Abo bychmy-li na wěsty čas nowozałoženym předewzaćam přemysłowy dawk spušćili, a tak startup-firmy do kónčiny wabili. Wosebite hospodarske pasmo by, tež hdyž je wone hladajo na EU jeno ćežko zwoprawdźomne, zawěsće dobry zakład było, přichodnje dosć předewšěm atraktiwnych dźěłowych městnow we Łužicy zasydlić a zachować.