CDU/CSU chcyła z dokumentom energijopolitiski profil wótřić

Berlin (dpa/SN). Předsyda krajneje skupiny CSU w zwjazkowym sejmje Alexander Dobrindt ma za wopačne, wažne politiske temy kaž kónc zmilinjenja brunicy ryzy fachowemu gremijej přewostajić. Hladajo na dźěło wuhloweje komisije je wón wčera w Berlinje kritizował, zo so tajka wažna tema ze zjawneje debaty prosće zhubi, hdyž politiske rozsudy na te­ wašnje do gremija ekspertow „wurisaja“. Ludnosć na te wašnje pozdatnje prawe politiske rozsudy hižo na wědomje njebjerje. „To płaći ćim bóle za skónčenje wudobywanja brunicy.“ Dobrindt sej žada, zo přichodnje wjace rozsudow w parlamentach a w politice roz­jimaja.

Je-li tema změny klimy za wolerjow rozsudna a maja-li ju na lisćinje temow cyle horjeka, dyrbjeli so politikarjo z njej rozestajeć. Dyrbjał-li so w tutej komu­nikaciji problem mjez posrědkowarjom a přijimarjom informacije pokazać, su zamołwići wočiwidnje wopačny medij wužiwali, Dobrindt doda.

Z kumštnymi maćiznami zwjazuja ludźo skerje negatiwny image, byrnjež je wšědnje wužiwali. Hač su to konsole w awtach, pisaki abo nopaški za kwětki, wšudźe je maćizna zasadźena, kotruž samozrozumliwje wužiwamy. We Łužicy něhdźe 90 přede­wzaćow kumštne dźěle zhotowja. Ličba – wona je mje sprawnje prajene překwapiła – pak pokazuje, kak sylny tónle stołp industrije za hospodarstwo w regionje je. Nětko předewzaća ofensiwnje wo dorost wabja, zo móhli swoje nadawki spjelnić. Su dźě dosć inowatiwne, kaž přilubichu to jich jednaćeljo nowinarjam w kubłanskim centrumje Polysax, hdźež swojich wučomnikow a přistajenych w jednotliwych technikach wukmanjeja. Na swójsku iniciatiwu su tónle centrum załožili, zo móhli sobudźěłaćerjow dosahajcy kubłać. Iniciatiwa předewzaćelow je tuž wšeje chwalby hódna. Woni nječakaja na kwalifikowanych ludźi, ale prócuja so sami aktiwnje wo swojich fachowcow. Bianka Šeferowa

Skupina šulerkow a šulerjow UNESCO-šule z čěskeho města Semily přebywaše wčera w Hornjej Łužicy. Mjez druhim pobychu na Budyskim Serbskim gymnaziju, w redakciji Serbskich Nowin, w Smolerjec kniharni a w Serbskej kulturnej informaciji. Na wšitkich stacijach zhonichu tójšto zajimaweho wo stawiznach a nětčišim žiwjenju Serbow. W redakciji SN jim šefredaktor Janek Wowčer rozłoži, kak wječornik w Ludowym nakładnistwje Domowina nastawa a kak je w nowych medijach zastupjeny. Za jara zajimawe mějachu čěscy hosćo bliskosć serbšćiny a čěšćiny. Tak su nimale wšitko zrozumili, štož jim Wowčer serbsce a dźělnje tež čěsce wo Serbskich ­No­winach­ wujasni. Foto: SN/Hanka Šěnec

Koparjo francoskeje narodneje wubranki, kotraž je sej loni titul swětoweho mištra wuwojowała, su wotnětka čłonojo francoskeje Čestneje legije. Prezident Emmanuel Macron je jim wčera w Pariskim Élyséeskim palasće najwyši zasłužbowy rjad kraja přepodał. K wuznamjenjenym słušeja tež trenar Didier Deschamps a sobudźěłaćerjo koparskeho mustwa. Čestnu legiju bě Napoleon 1802 załožił.

Z přećelnymi chłostankami chcedźa w Annabergu-Buchholzu přichodnje šoferow pochwalić, kotřiž přikładnje parkuja. Mjeztym zo dyrbja šoferojo wopak wotstajenych awtow dale z pjenježnej pokutu za woknotrějakom ličić, móža so šoferojo z korektnym zadźerženjom nastupajo parkowanje připóznaća nadźijeć. „Super parkowane – dale tak!“ steji na pisanych kartach. Nimo toho rozdźěleja tam titki z gumijowymi barikami.